A xuíza cre que o fillo do fundador de Mango matou o seu pai polo diñeiro

A xuíza que investiga a morte de Isak Andic, fundador de Mango, conclúe que hai indicios de que o seu fillo Jonathan o matou de forma "premeditada" pola súa "obsesión co diñeiro", ante o temor de que o seu pai cambiase o testamento para destinar parte da súa fortuna a unha fundación de axuda social.

No auto no que acorda prisión para Jonathan Andic eludible cunha fianza dun millón de euros, a xuíza enumera media ducia de indicios que apuntan a unha "participación activa e premeditada" do detido na morte do seu pai, o home máis rico de Cataluña, ao precipitarse nunha ruta de montaña en Collbató (Barcelona) en decembro de 2024.

Os indicios recompilados polos Mossos d'Esquadra, que analizaron o móbil de Andic e interrogaron o seu contorno, levan a xuíza a conxecturar que o móbil do suposto homicidio podería ser económico e vinculado á "mala relación" que mantiñan pai e fillo, desmentida pola familia do fundador de Mango.

Exercía unha "manipulación emocional" sobre o seu pai

A maxistrada de Martorell (Barcelona) subliña que Jonathan Andic tiña unha "obsesión co diñeiro" e que, para lograr os seus obxectivos económicos, exercía unha "manipulación emocional" sobre o seu pai.

En concreto, a xuíza remarca que, aínda que o investigado negou calquera desavinza co empresario falecido, a análise das mensaxes de Whatsapp demostran "o contrario" e que o motivo principal desa mala relación era a súa "obsesión" co diñeiro, até o punto de que pediu ao seu pai unha herdanza en vida que este "se viu obrigado a aceptar".

Segundo a instrutora, a mediados de 2024 Jonathan soubo que o seu pai tiña intención de cambiar o testamento para crear unha fundación de axuda a "persoas necesitadas", o que motivou un "cambio notable" na súa relación co empresario.

O fillo acudiu tres veces ao lugar nos días previos

Jonathan Andic, engade a maxistrada, recoñeceu que a súa actitude co diñeiro non era correcta e o pai, "nun intento de reconciliarse co seu fillo", aceptou a excursión que lle propuxo co fin de falar os dous sós.

O auto tamén destaca as contradicións do investigado respecto a que fora unhas dúas semanas antes ao camiño onde morreu o seu pai, xa que a xeolocalización do seu vehículo sitúao no lugar os días 7, 8 e 10 de decembro de 2024.

A xuíza tamén se basea nas conclusións da unidade de montaña dos Mossos, que tras efectuar dez simulacros determinaron que para conseguir unha pegada similar á atopada tras o accidente "é necesario que se faga como mínimo catro veces nos dous sentidos", polo que é unha acción que debe ser "deliberada, exercendo presión no chan".

Deste modo, realizando un só rozamento cara adiante simulando un esvarón "non se pode xerar unha pegada como a localizada o día dos feitos", apunta a maxistrada, que subliña que esa marca "non se pode realizar de forma fortuíta".

As contradicións do fillo

No seu auto, a xuíza enumera as "contradicións" de Jonathan Andic nas súas diferentes declaracións, as primeiras aos Mossos tras a morte do seu pai, os días 14 e 31 de decembro, e as deste martes en sede xudicial, unicamente a preguntas da súa defensa.

Na primeira das declaracións, a do 14 de decembro, afirmou que "se adiantou uns catro ou cinco metros por diante do seu pai", que este se parou para tomar unhas fotografías e sen telo á "vista", xirouse e viu "un corpo rodando entre os matogueiros, e escoitou un forte golpe e un xemido de dor".

Con todo, o 31 de decembro declarou que o seu pai fixo uso do teléfono ao principio do percorrido, e que xa "non o volveu ver que o utilizase".

A investigación dos Mossos do volcado do móbil do empresario falecido determina que "só" o utilizou ao inicio do camiño, e que non fixo uso del no "lugar dos feitos", é dicir, desde onde se precipitou ao baleiro.

Distintas versións ante emerxencias e os Mossos

A xuíza tamén destaca que cando Jonathan Andic chamou ao servizo de emerxencias afirmou en primeiro lugar que cría que o seu pai caera por un barranco, aínda que logo cando o chamou unha enfermeira do Sistema de Emerxencias Médicas (SEM) "modificou a versión" e díxolle que el ía diante e que escoitara un ruído de pedras e que, ao xirarse, vira o seu pai berrar e caer.

Esta declaración, resalta a xuíza, tamén difire da que prestou ante os Mossos.

Ademais, a xuíza subliña que o informe forense determina que a caída de Isak Andic foi como se "se lanzase por un tobogán, cos pés por diante", de forma que todas as lesións foron no lado dereito e en forma ascendente, sen afectación nas mans, polo que se descarta "o esvarón cunha pedra ou caída cara adiante".

A xuíza tamén apunta como indicio o feito de que Jonathan Andic cambiase de teléfono móbil o 25 de marzo de 2025 e borrase o contido do antigo, que segundo lle dixo á súa secretaria lle roubaran en Quito (Ecuador) nunha "viaxe lóstrego" que realizou entre o 24 e o 26 de marzo, coincidindo coas noticias sobre a reapertura da investigación xudicial.