O exxefe financeiro da empresa de Trump declárase culpable de fraude fiscal

Allen Weisselberg, o exdirector financeiro da Organización Trump, declarouse este xoves culpable por conspirar durante anos coa empresa nunha trama de fraude. Weisselberg traballou durante décadas para o negocio do expresidente estadounidense Donald Trump e está considerado como un dos seus escudeiros máis fieis. 

Alcanzou un acordo coa Fiscalía e será sentenciado a cinco meses de cárcere, cinco anos de liberdade condicionada e o pago de case dous millóns de dólares ás arcas públicas.

Ademais, o executivo comprométese a declarar no caso de ser solicitado durante o xuízo por fraude fiscal ao que se enfronta a Organización Trump. Este xuízo comezará o próximo 24 de outubro, aínda que se resistiu a cooperar cos fiscais noutras investigacións sobre a compañía.

"Hoxe Allen Weisselberg admitiu ante a Corte que usou a súa posición na Organización Trump para estafar aos contribuíntes e enriquecerse", dixo nun comunicado o fiscal do distrito de Manhattan, Alvin Bragg, quen destacou que a declaración de culpabilidade "implica directamente á Organización Trump nunha ampla gama de actividades delituosas".

Bragg considerou que o testemuño do exxefe financeiro será "de valor incalculable" durante o xuízo contra a compañía e deixou claro que as investigacións sobre a empresa e sobre o propio expresidente continúan.

Weisselberg declarouse culpable dos 15 cargos que se lle imputaron e que inclúen delitos de fraude fiscal, conspiración e falsidade documental.

A empresa de Trump e o directivo foron acusados o pasado verán de operar durante máis de 15 anos unha trama de evasión fiscal, na que supostamente pagaban a executivos "por baixo da mesa", dándolles unha parte importante das súas compensacións de forma que se puidese reducir o pago de impostos.

A Organización Trump, tal e como recoñeceu o seu exdirector financeiro, pagaba a esas persoas soldos máis reducidos -co que reducía os seus impostos de persoal- e á vez ofrecíalles compensacións á marxe que non se notificaban adecuadamente ás autoridades.

Entre outras cousas, Weisselberg e outros executivos obterían aloxamento, matrículas para colexios privados e pagos en efectivo para cubrir todo tipo de gastos persoais.

O exdirector financeiro recoñeceu este xoves embolsar máis de 1,7 millóns de dólares polos que non pagou impostos, tal e como aseguraban os fiscais.

O caso é froito das amplas investigacións ás que foi sometida nos últimos anos a Organización Trump, pero nel non está imputado o expresidente, que ten abertas numerosas frontes legais tanto polos seus negocios como polas súas accións durante e despois do seu paso pola Casa Branca.

En Nova York, Trump enfróntase a unha investigación polas prácticas empresariais da súa compañía, pola que tivo que comparecer este mes ante a Fiscalía Xeral do estado, aínda que se negou a responder as súas preguntas.

O exmandatario republicano viu tamén recentemente como o FBI rexistraba a súa mansión de Florida en busca de documentos clasificados que supostamente levou cando abandonou o poder en 2021 e enfróntase a varias demandas polo ataque ao Capitolio en xaneiro dese ano.