O euríbor sobe ao 3,1%, o valor máximo do que vai de ano
As hipotecas variables ás que lles toque revisión verán aumentar as súas cotas mensuais
Unha das claves económicas desta semana está na suba do euríbor, que xa se sitúa por riba do 3,1%. Este valor de referencia fundamental do mundo financeiro comezou un ascenso disparado en marzo. A cifra acadada en setembro é a máis elevada do que vai de ano.
En xaneiro de 2021 o euríbor a doce meses marcou o seu mínimo histórico. Daquela, o 52% das novas hipotecas eran a tipo variable.
O euríbor mantívose en negativo durante máis de seis anos, entre 2016 e 2022. Agora o indicador sitúase por riba do tres por cento e marca máximos do ano. As persoas que teñan un préstamo a tipo variable e teñan que revisalo proximamente notarán a suba do euríbor na súa cota mensual.
"Unha persoa cunha hipoteca de 170.000 deberá pagar uns 80 mensuais máis ao mes, case mil euros ao ano, máis o diferencial que teña co seu banco", explica Maiko Sanhueza, da inmobiliaria coruñesa Urbeko.
Existe a posibilidade de negociar co banco unhas condicións máis favorables ou mesmo cambiar de entidade e contratar un novo préstamo. Pero antes de tomar unha decisión, os expertos recomendan revisar polo miúdo as condicións e facer contas para comprobar se realmente compensa.
"Moitas veces hai que valorar se esa posibilidade de cancelación da hipoteca e contratación dunha nova con outra entidade finaceira non implica unha serie de gastos, sobre todo de cancelación", puntualiza José Peña, asesor en Analiza 360.
A evolución de setembro podería verse condicionada polo que decida o BCE o vindeiro día 10. Se mantén a senda que agarda o mercado, o euríbor podería manterse por riba do tres por cento.
