A Xunta acusa o Goberno de querer expulsar toda actividade económica da costa
A CEG oponse a que as concesións no dominio público marítimo-terrestre sexan por concurso, como propón o Goberno
A conselleira de Medio Ambiente e Cambio Climático, Ánxeles Vázquez, acusou este martes o Goberno central de querer expulsar toda actividade económica da costa e defendeu que a reforma do regulamento que quere aplicar non responde as peticións de Europa.
Vázquez reuniuse coa Confederación de Empresarios de Galicia (CEG) para abordar as implicacións que terá o proxecto normativo para modificar o regulamento de costas e, en declaracións a medios de comunicación, dixo que ese texto é "mesmo peor" que a previsión que tiñan na Xunta.
"O que vén dicir é que se van reducir as concesións, que non se van a dar máis concesións na costa. En conclusión, que se vai a expulsar da costa a toda actividade económica, incluído tamén o sector primario", afirmou. E criticou que a "escusa" sexa o expediente de infracción aberto por Europa sobre este asunto.
Con todo, Vázquez asegurou que Europa si pediu a España que adapte a súa normativa de costas á perspectiva europea, pero no caso das concesións o que fixo foi preguntarlle se as prórrogas son automáticas.
"España non responde. A miña resposta é que non se dan prórrogas automáticas en ningún caso porque sempre se fan as avaliacións ambientais pertinentes. Por tanto, o problema non é de Europa, teno o Estado español que por ideoloxía, descoñecemento e despropósito dicir seguir un camiño que non ampara nin avala ningunha comunidade autónoma", referiu.
E acusou o Ministerio para a Transición Ecolóxica de "non dar a cara" e tentar aprobar a reforma "pola porta de atrás" sen contar coas comunidades nin levala ao Congreso ou ao Senado por non ter maioría absoluta.
"Isto para Galicia e o resto das comunidades é terrible desde o punto de vista económico e social", defendeu, xa que, ao seu xuízo, rompe a confianza das empresas ás que se lles outorgou unha concesión e tamén a lealdade institucional.
Tamén alertou sobre o impacto que terá para as empresas galegas o presidente da CEG, Juan Manuel Vieites, que cualificou como "moi preocupante" unha normativa que se quere sacar desde o Ministerio "de forma unilateral". "E sobre todo, a deriva que está a tomar o Ministerio", que está "a deixar a un lado" o traballo conxunto coas comunidades para "impoñer" a nova normativa, dixo.
Vieites defendeu que no litoral pode haber actividade económica sempre que cumpra coa normativa, pero que esta debe ser "adecuada e con sentido común".
