O emprego marca récord en 21,58 millóns de afiliados tras sumar 230.993 ocupados

O emprego marcou un rexistro histórico en abril cun total de 21.588.639 afiliados á Seguridade Social, tras sumar 230.993 persoas ocupadas de media, case a metade no sector da hostalería pola campaña de Semana Santa, o cal supón o segundo mellor mes de abril de toda a serie tras o de 2023.

O número de desempregados rexistrados nas oficinas de emprego reduciuse en 67.420 persoas en abril e situouse nun total de 2.512.718, marcando a cifra máis baixa desde xullo de 2008, de acordo cos datos publicados este martes polos ministerios de Traballo e de Seguridade Social.

Este mes alcanzouse tamén récord de mulleres de alta na Seguridade Social, cun total de 10.238.541, e de traballadores autónomos, ao superárense os 3,4 millóns, 12.950 máis que en marzo.

A ministra de Inclusión, Seguridade Social e Migracións, Elma Sáiz, destacou que a afiliación segue marcando récords "incluso quitando o efecto Semana Santa", unha tendencia que se mantén cun máximo de emprego feminino, un aumento dos autónomos e "melloras da calidade", un "éxito de país" resultado da reforma laboral e outras políticas do Goberno.

A vicepresidenta segunda e ministra de Traballo, Yolanda Díaz, celebrou as "moi boas" cifras de paro de abril, sobre todo de desemprego xuvenil -que baixou do 10 % por primeira vez, subliñou-, grazas á reforma laboral. En termos interanuais, a afiliación aumentou en 487.134 persoas (a un ritmo do 2,31 %), en tanto que o paro reduciuse en 153.782 desempregados (un 5,77 % menos).

Tirón da hostalería pola Semana Santa

O positivo dato de emprego é consecuencia do tirón da hostalería, que sumou 108.513 ocupados en plena campaña turística de Semana Santa. Por detrás sitúanse os aumentos de afiliación no comercio (15.677), as actividades administrativas (15.343) e o transporte e almacenamento (11.603).

Entre os autónomos os maiores crecementos mensuais de afiliación rexistráronse na hostalería (3.475), o comercio (1.976), as actividades profesionais científicas e técnicas (1.908) e a construción (1.665), fronte á caída no ámbito de transporte e almacenamento (-1.320). A temporalidade mantense en mínimos, cun peso dos traballadores temporais do 11,9 %, cando na media 2017-2021 era do 29,5 %.

O número de traballadores con contrato indefinido supón o 88 % do total de afiliados, co que xa son máis de 15 millóns de traballadores, tras aumentar en máis de 4 millóns desde que se aprobou a reforma laboral. Dentro de réxime xeral destaca tamén o incremento en 18.763 afiliados ao sistema especial agrario, fronte á continuada caída do sistema especial do fogar, que en abril perdeu 1.014 persoas.

Baixa o paro, sobre todo nos servizos

Por sectores económicos, o paro rexistrado diminuíu principalmente entre os desempregados provenientes dos servizos, con 49.660 persoas menos, seguidos xa de lonxe polos da construción (3.817 menos), a agricultura (3.323 menos) e a industria (2.920 menos). Entre o colectivo sen emprego anterior, o desemprego reduciuse en 7.700 persoas.

O desemprego feminino baixou en 38.291 mulleres, ata totalizar as 1.515.487 paradas, mentres que o masculino fíxoo en 29.129 homes, baixando así por primeira vez desde marzo de 2008 do millón de desempregados (997.231 rexistrados).

O desemprego xuvenil (menores de 25 anos) descendeu en 20.095, o maior descenso nun mes de abril desde 2001, de forma que deixa o total de mozos parados nos 177.429, a menor cifra da serie histórica para ese mes. 

O 44,5 % dos contratos, indefinidos

O total de contratos rexistrados durante o mes de abril foi de 1.140.733 (126.707 menos que un ano antes), dos que 507.903 foron de carácter indefinido (44,52 %) e o resto, 632.830, temporais. Por tipo de xornada, 637.324 foron a tempo completo (81.452 menos), 329.427 a tempo parcial (28.844 menos) e 173.982 fixos discontínuos (16.411 menos).

Galicia reduciu o paro en 3.610 persoas en abril e creou máis de 8.000 empregos

O paro baixou en Galicia en abril en 3.610 persoas, un 3,03 % respecto ao mes anterior, en que na comunidade autónoma se crearon 8.038 empregos, un 0,74 % máis que en marzo.

Segundo os datos divulgados este martes polo Ministerio de Traballo e Economía Social, no mesmo período, o paro baixou no conxunto de España en 67.420 persoas, un 2,61 % máis, case medio punto menos que en Galicia.

En cambio, durante o mes de abril, segundo os datos do Ministerio de Inclusión, Seguridade e Migracións, no conxunto do país creáronse 230.993 empregos, un 1,08 % máis, tres décimas máis que en Galicia.