O Deportivo asalta a Cerámica (2-3) comandado por Aubameyang
O dianteiro marcou o gol do triunfo, pero xa repartira dúas asistencias coas que se neutralizaron as vantaxes locais
Os de Hidalgo suman dúas vitorias e dous empates en catro partidos
O Deportivo segue sumando neste ilusionante inicio da temporada. Na Cerámica sumou a segunda vitoria en catro xornadas, nas que aínda non perdeu. E foi cunha actuación espectacular de Aubameyang, protagonista nos tres goles.
O Vilarreal entrou mellor ao partido e, froito do seu dominio, comezou a achegarse con perigo á área de Leo Román. Pero non creaba ocasións claras de gol. Os coruñeses buscaban as súas opcións á contra. Esta tónica mantívose ata o minuto 18, cando un balón longo para Pepe provocou a indecisión do porteiro. O dianteiro do submarino non perdoou, e marcou cun disparo desde a frontal.
Co 1-0 no marcador chegaron os mellores momentos do Deportivo, que gozou de varias ocasións claras. Un envío para Aubameyang rematouno o ariete moi preto do pau. Despois, non atinou a controlar outro servizo. Nsongo Bil probou fortuna tamén cun potente disparo lonxano.
O Vilarreal tiña problemas na saída, pero fíxose outra vez co control e gozou doutra clara ocasión á saída dunha falta. Nsongo meteu a viqueira da bota para impedir o remate de Gerard Moreno.
Volveuse refacer o Deportivo, que avisaba outra vez cunha volea de Aubameyang que acababa en córner. Pero o de Gabón vestiuse de asistente na seguinte, e un gran servizo seu aproveitábao Luismi Cruz para facer o gol do empate no minuto 42.
A volta de pausa, o Vilarreal volveuse estirar á busca do segundo. Moleiro tivo unha boa ocasión despois dunha parede, pero sacoulla Leo Román. E o porteiro detivo tamén a seguinte, de Pape Gueye. No minuto 9 chegou a máis clara, cun remate de Pepe desde o punto de penalti que, con Leo Román xa batido, marchou desviado.
Á hora de partido, unha falta desde a frontal remachábaa Pape Gueye ao fondo da rede, pero Gil Manzano anulaba o tanto por unha infracción dos compañeiros que estorbaban á barreira.
Seguía apertando o submarino, e Mikautadze remataba arriba desde o punto de penalti. Pero o gol ía chegar nunha acción estrana. Un centro desde a dereita que Traoré despexaba contra a súa propia portería, marcando por riba de Leo Román desde a frontal.
Un gol atípico, que non tombou aos coruñleses. So tres minutos despois, Aubameyang asistía a Zaka e o dianteiro, que acababa de entrar, marcaba pola base do primeiro pau. 2-2 e todo por decidir.
No treito final, Yeremay tivo unha gran ocasión, pero o seu remate estrelouse na defensa. Tiña que ser Aubameyang o que decidise o encontro. O dianteiro caéulle un mal envío do rival, e galopou medio campo para plantarse diante do porteiro Luiz Junior e batilo por baixo. Dúas asistencias e un gol de Aubameyang obraron a remonta na Cerámica, un escenario de Champions. O Deportivo suma a súa segunda vitoria en catro partidos, e colócase na zona de privilexio da táboa.
