Afondamos no traballo nocturno da Policía Nacional que vela pola nosa seguridade

A capital de Galicia pode parecer unha cidade tranquila, pero as actuacións son constantes para manter a orde pública, como amosa o traballo da Policía Nacional cada día e, sobre todo, cada noite.

En canto saímos en ruta, a veciñanza alertou da presenza dun indixente que en máis dunha ocasión provocou incendios no portal onde adoita durmir porque padece algún tipo de trastorno. A policía logrou que esa persoa fose nunha ambulancia ata o Hospital Clínico Universitario de Santiago para facerlle unha avaliación psiquiátrica, pero pouco despois saía outra vez á rúa.

A principal función da Policía Nacional é xestionar delitos ou condutas delitivas, pero ante outro tipo de problemas sociais coma este, eles poden mediar pero non teñen man para resolver o conflito de xeito definitivo ao ser un tema de asuntos sociais.

A venda de drogas é outro tema presente cada día no traballo das patrullas, que poñen os cinco sentidos para detectar movementos sospeitosos. Comprobamos que coñecen a cidade como a palma da súa man observando comportamentos con moita pericia que derivaron en varias actuacións policiais con persoas vencelladas a puntos de venda de drogas na cidade.

Noutra das chamadas, a cidadanía alertaba dunha lea de parella, como proba da concienciación sobre a violencia de xénero.​​​​​​ Outro aviso da cidadanía advertiu da presenza dunha persoa saltando o valo dun parque infantil pechado durante a noite. Ao final non pasou nada, unha invasión de domicilio público pero sen maiores riscos. 

Os axentes tamén detectaron consumo de estupefacientes, prohibido na vía pública, en varios puntos da cidade. A experiencia dos axentes no tocante ao comportamento é imprescindible á hora de detectar estas condutas.
 

A rapidez na actuación policial é determinante para coller os delicuentes coas mans na allada, pero a observación tamén é decisiva. Manter o equilibrio entre a empatía e a avaliación dos riscos é vital, pero comprobamos que a nosa colaboración cidadá, ten moito peso para poñelos en alerta