O Deportivo Abanca busca seguir coa boa serie no campo do Español

O Deportivo Abanca adestrouse esta mañá para marchar despois cara a Barcelona. Comeza o mes de marzo visitando mañá o Español.

Chega a esa cita logo dun moi bo comezo de ano, con cinco xornadas sen perder. Buscará a sexta diante dun rival directo que na primeira volta conseguira asaltar Riazor. Un gol de Ainoa, nunha acción a balón parado, déralle os tres puntos ao Español no peor momento da temporada do Deportivo.

Agora cambiaron moito as cousas. O equipo de Fran Alonso ten sete puntos de marxe co descenso e dous de vantaxe co Español, que non gaña desde comezos de decembro. Un triunfo achegaría moito a permanencia.