O debate sobre a transferencia da AP-9 a Galicia chegará este xoves ao Congreso
A cita está prevista para o xoves 26 ás 8:30 horas, antes da sesión plenaria
(Arquivo TVG)
O debate sobre a lei de transferencia da AP-9 a Galicia avanzará esta semana no Congreso dos Deputados, tras as queixas reiteradas de PPdeG e BNG de "bloqueo" --as emendas rexistráranse en outubro--, tendo en conta que se fixou a sesión constitutiva do relatorio para este xoves.
En concreto, a cita está prevista para o xoves 26 ás 8:30 horas, antes da sesión plenaria.
O deputado do PPdeG no Congreso Celso Delgado explicou que a Mesa e voceiros da Comisión de Transportes mantiveron unha reunión na mañá deste martes, antes da cita ordinaria prevista do órgano, e afirmou que urxiu a constitución do relatorio.
"O PSOE quería de novo dilatar a súa celebración ata pasada Semana Santa, o 14 de abril, pero insistín en que podiamos facelo o xoves, media hora antes que o pleno. O deputado do BNG Néstor Rego secundou a miña proposta e insistiu nela e tamén asentiron outros voceiros, polo que o criterio do PSOE non prosperou", manifestou.
A deputada socialista Patricia Otero reivindicou o papel dos socialistas nesta tramitación fronte a un PP que foi quen "ampliou a concesión da autoestrada ata o ano 2048".
"Unha ampliación, por certo, que agora mesmo está a ser cuestionada por Bruxelas", esgrimiu a socialista que incidiu en que os populares "primeiro regalaron a autoestrada, despois bloquearon calquera solución" e agora pretenden dar "leccións".
Tamén desde o BNG se arrogan a capacidade para desbloquear o proceso, aínda que o deputado Néstor Rego cre que a convocatoria da reunión "non é suficiente" e que "debe aprobarse un calendario de traballo e unha folla de ruta clara para completar o proceso".
"Esperamos case dous anos con atrasos e tivo que ser unha negociación do BNG a que desbloquease a tramitación por parte do Congreso da lei para a transferencia do AP-9", expuxo o parlamentario do Bloque.
Así as cousas, Rego asegurou que ou este relatorio se convoca "de inmediato" ou os nacionalistas darían por afectada a colaboración do BNG co PSOE e o Goberno central.
