O CXPX acorda por unanimidade que a folga de xuíces carece de base legal
Fontes do Poder Xudicial sosteñen que non se prevén sancións disciplinarias aos xuíces que participen na folga contra as reformas en material de xustiza anunciadas polo Goberno
Concentracións deste mes contra as reformas na xustiza (Europapress)
O pleno do Consello Xeral do Poder Xudicial (CXPX) acordou por unanimidade que o exercicio do dereito a folga de xuíces carece, polo momento, de soporte normativo e, polo tanto, "non procede ter por anunciada" a folga convocada por cinco asociacións xudiciais e fiscais a próxima semana.
Fontes do órgano de goberno dos xuíces informaron a EFE do acordo unánime adoptado polo CXPX sobre a ausencia de base legal nunha folga de xuíces e maxistrados e, en consecuencia, determinaron que o Consello non pode fixar ningún tipo de servizos mínimos.
Os vogais reuníronse este xoves nun pleno extraordinario para pronunciarse sobre a folga convocada por cinco das sete asociacións de xuíces e fiscais a semana que vén, tras a concentración prevista este sábado, en contra dos proxectos lexislativos que reforman o acceso á carreira e o estatuto do Ministerio Fiscal.
O Ministerio de Xustiza solicitou que o Poder Xudicial se pronunciase sobre a legalidade desa folga, como fixo en febreiro de 2009, cando resolveu que os xuíces non teñen dereito a esa medida de protesta.
Fontes do órgano consultadas por Europa Press sosteñen que non se prevén sancións disciplinarias aos xuíces que participen na folga.
