O Consello de Seguridade da ONU apoia o plan marroquí para o Sáhara Occidental

O Consello de Seguridade de Nacións Unidas acordou este venres prorrogar un ano o mandato da Misión de Nacións Unidas para o Referendo do Sahara Occidental (MINURSO), ao aprobar unha resolución que apoia o plan de autonomía marroquí para a excolonia española. Un total de once países votaron a favor, mentres que ningún opúxose.

Con todo, cabe mencionar que tres se abstiveron: Alxeria, A China e Rusia. Co visto e prace a este documento presentado polos Estados Unidos, o mandato da MINURSO estará vixente ata outubro de 2026.

O representante estadounidense ante a ONU, Mike Waltz, defendeu que o texto aprobado foi froito de "un esforzo xenuíno e constante por incorporar as propostas de todos", e afirmou que Washington está "profundamente decidido a apoiar unha solución mutuamente aceptable" para a excolonia española.

"Exhortamos a todas as partes a que aproveiten as próximas semanas para sentar á mesa e participar en conversacións serias, utilizando a proposta de autonomía de Marrocos, que é crible e que é a única solución xusta e duradeira a esta cuestión", declarou.

Mohamed VI afirma que Marrocos abre un “novo capítulo” e chama os saharauís de Tinduf a reunirse coas súas familias 

O rei Mohamed VI asegurou que Marrocos abre un “novo e vitorioso capítulo” tras medio século de conflito no Sáhara Occidental.

Nun discurso á nación, o monarca afirmou que, “tras 50 anos de sacrificios”, o país inicia unha nova etapa “no proceso de consagración da identidade marroquí do Sáhara”, coa finalidade de “poñer fin definitivamente a este conflito artificial mediante unha solución consensuada baseada na Iniciativa de Autonomía”.

Mohamed VI subliñou que este “cambio histórico” coincide coa conmemoración do 50 aniversario da Marcha Verde e celebrou que “o recoñecemento da soberanía económica” sobre as “provincias do sur” se ampliase coa decisión da Unión Europea e de varios países, entre eles España e Estados Unidos, de fomentar investimentos na zona.

“Estamos a vivir un momento crucial e un punto de inflexión decisivo na historia moderna de Marrocos: a partir de agora haberá un antes e un despois do 31 de outubro de 2025”, afirmou. “Chegou o momento dun Marrocos unido, que se estenda desde Tánxer ata La Agüera”, engadiu.

O monarca destacou que o país entra “nunha fase decisiva”, xa que a resolución da ONU “define os principios que poden conducir a unha solución política definitiva”.

Prometeu “actualizar e perfeccionar” a súa proposta para alcanzar un acordo “que preserve a dignidade de todas as partes, sen vencedores nin vencidos”.

Neste contexto, apelou ás persoas refuxiadas nos campamentos saharauís de Tinduf (Alxeria) a aproveitar “esta oportunidade histórica para reunirse coas súas familias” e participar no desenvolvemento dun “Marrocos unido”. Afirmou que “todos os marroquís son iguais” e que “non existe diferenza algunha entre quen regresou de Tinduf e quen reside no resto do territorio nacional”.

Mohamed VI convidou o presidente alxerino, Abdelmayid Tebune, a manter “un diálogo sincero e fraternal” para “superar as diferenzas” e construír “novas relacións baseadas na confianza e na boa veciñanza”.

Finalmente, expresou un “recoñecemento especial” aos Estados Unidos, baixo o liderado do seu “amigo” Donald Trump, por “achanzar o camiño cara a unha solución definitiva”, e agradeceu tamén o apoio de España, Reino Unido e Francia, así como o respaldo dos países árabes, africanos e doutros estados que apoian a proposta marroquí.