Publicador de contidos

O Congreso lembra as 1.118 mulleres asasinadas por violencia machista desde 2003

O Congreso lembra as 1.118 mulleres asasinadas por violencia machista desde 2003

Na súa declaración, Batet fixo especial mención aos menores afectados por esta eiva

O Goberno acusou a Vox de impedir unha declaración institucional polo 25-N

Sánchez reivindica a loita contra a violencia machista como "cuestión de Estado"

G24.gal 25/11/2021 10:09

O Congreso lembrou este xoves as 1.118 mulleres asasinadas pola violencia machista desde 2003 e todas as vítimas "directas ou indirectas" desta lacra, en especial os nenos e nenas.  

Fíxoo a través dunha declaración da presidenta da Cámara, Meritxell Batet, con motivo do Día Internacional da Eliminación da Violencia contra as Mulleres, que se celebra cada 25 de novembro.

O PSOE e Unidas Podemos promoveron unha declaración institucional da cámara de condena da violencia machista pero non lograron a unanimidade necesaria para que fose lida no pleno. Os dous partidos que conforman o Goberno de coalición acusaron a Vox de vetar o texto.

Por iso,  Batet tomou a iniciativa lendo a súa propia declaración e lembrando a todas as vítimas, directas e indirectas, da violencia contra as mulleres, en especial as asasinadas polas súas parellas ou  exparellas e mais os menores.

"A violencia contra as mulleres constitúe unha violación dos dereitos humanos e das liberdades fundamentais e impide o total desenvolvemento dun Estado social e democrático de dereito", sentenciou  Batet.  

As palabras da presidenta foron respondidas co aplauso da maioría dos deputados que se atopaban no hemiciclo ao comezo desta sesión plenaria; a ese xesto non se sumaron os representantes de Vox presentes no Salón de Plenos.

"Erradicar a violencia machista é unha cuestión de Estado. Non podemos permitir que as mulleres sexan asasinadas por seren mulleres, que teñan medo, que non vivan en liberdade", escribiu o presidente do Goberno, Pedro Sánchez, na súa conta de Twitter, e puntualizou: "Só seremos unha sociedade xusta cando acabemos con calquera violencia contra as mulleres. 25-N, nin unha menos".

Sánchez publicou unha curtametraxe documental denominada Xuntas. Nela expóñense testemuños de mulleres, da Plataforma de Asociacións de Vítimas de Agresións Sexuais ou de expertas en educación que loitan contra unha violencia "sistémica" e ven fundamental un cambio na cultura.

No vídeo tamén aparece a  exvicepresidenta do Goberno de José Luis Rodríguez Zapatero e presidenta do Consello de Estado María Teresa Fernández de la Vega, que sinala a España como un país "que abandeira" a loita contra a violencia, pero insiste: "É un problema de todas e só xuntas podemos gañar a batalla".

Sánchez acompaña esta campaña reiterando o "sólido e firme compromiso" do Goberno coa igualdade efectiva entre mulleres e homes e coa erradicación de todas as formas de violencia machista. 
 

Publicidade
Publicidade
Publicidade
Pódeche interesar