O Congreso reproba pero non sanciona a deputada do PP que levou gas pementa á Cámara

A Mesa da Deputación Permanente do Congreso reprobou este martes cos votos de PSOE e Sumar a conduta da deputada do PP Ana Belén Vázquez por levar ao hemiciclo un spray de gas pementa aínda que non será suspendida porque ao estaren disoltas as Cortes non hai pleno para aprobar a sanción.

O Congreso abrira expediente a Vázquez tras o ocorrido o pasado 23 de setembro pero a disolución das Cortes impediu someter o pleno a súa suspensión de emprego e soldo durante unha semana, que era a proposta que se ía elevar a consideración plenaria.

A conduta da deputada do PP é "reprobable"

Suspensión que se produciría, informaron fontes parlamentarias, durante a primeira semana de novembro, na que ao non haber pleno non perdería o seu dereito ao voto.

Coas Cortes disoltas, a maioría progresista da Mesa da Deputación Permanente -que substitúe á Mesa do Congreso nestes períodos- quixo deixar constancia de que se fose posible elevaríase a pleno a proposta de sanción e considerou o seu comportamento "reprobable" e o ocorrido dunha "indubidable gravidade".

20 persoas afectadas polo gas tóxico 

Os feitos polos que se abriu expediente á deputada popular tiveron lugar no pleno do 23 de setembro cando, durante a sesión de control ao Goberno, a presidenta do Congreso, Francina Armengol, pediu a Vázquez que abandonase o hemiciclo por ensinar unha "arma", un spray de gas pementa, durante a súa pregunta ao ministro do Interior, Fernando Grande-Marlaska.

Varias dependencias da Cámara foron precintadas posteriormente e unha vintena de persoas resultaron afectadas polo gas tóxico despois de que un asesor do grupo popular baleirara o spray en dous baños dun dos edificios de ampliación do Congreso.