O Concello de Vigo terá que pagar á familia do bombeiro falecido nunha derruba
A sentenza dun xulgado vigués di que a vítima asumiu durante catro anos responsabilidades superiores ao seu cargo
O Concello recoñecía o dereito da viúva a cobrar eses cartos aínda que non estaba de acordo coas cantidades
Edificio onde se produciu a derruba. Javier Vázquez/Europa Press (Arquivo).
O Concello vigués terá que pagar á familia de Sergio Sanlés, o bombeiro que morreu nun derrube en maio de 2024, as diferenzas retributivas en varios complementos porque durante varios anos asumiu funcións superiores a súa categoría, en concreto de cabo e sarxento.
O xulgado estima parcialmente o recurso da viúva
Na sentenza do xulgado do contencioso administrativo 2 de Vigo, do pasado mes de novembro, o xuíz estima en parte o recurso interposto pola viúva do funcionario, contra unha resolución municipal que rexeitaba as súas pretensións.
O xulgado expón que "non hai controversia entre as partes en canto ao feito constitutivo de que o finado, no seu posto de bombeiro do Concello de Vigo, desempeñou nos catro anos anteriores ao seu falecemento, gardas nas que asumiu as responsabilidades propias dos postos de sarxento e cabo".
O xuíz explica que o Concello de Vigo recoñece o dereito da viúva para percibir as diferenzas retributivas que lle puidesen corresponder ao seu marido, aínda que había controversia sobre a cantidade.
A familia cobrará as cantidades correspondentes a máis de 30 gardas
Agora, o xulgado recoñeceu que a administración municipal deberá abonar as cantidades correspondentes a máis de 30 gardas realizadas polo bombeiro, como cabo e como sarxento, entre 2021 e 2024, incrementadas no interese legal correspondente. A resolución é firme, e non cabe recurso contra ela.
