O Concello de Lugo nomea a Xesús Alonso Montero fillo adoptivo da cidade

A elección do expresidente da Real Academia Galega (RAG) Xesús Alonso Montero como fillo adoptivo de Lugo deu lugar a un episodio singular no pleno da cidade, dado que o PP votou a favor, xunto cos edís do PSdeG, mentres que o socio de goberno dos socialistas, o BNG, fíxoo en contra.

A postura duns e doutros xa era coñecida antes do pleno e, finalmente, non houbo sorpresas, de modo que o nomeamento do médico represaliado Rafael de Vega contou coa unanimidade do pleno, pero a de Alonso Montero saíu adiante só cos votos de populares e socialistas.

O tenente de alcalde e voceiro do BNG, Rubén Arroxo, insistiu na idea de que “é unha persoa que non ten o consenso da cidade para ser fillo adoptivo de Lugo”. De feito, dixo que “houbo moita xente que se achegou” aos nacionalistas nos últimos días para expresarlles o seu apoio á decisión do Bloque.

Segundo explicou, dixéronlles “home, menos mal”, porque “é unha persoa á que hai xente que valora de forma positiva e outra que non, por moi diferentes motivos”.

Con todo, a alcaldesa, Paula Alvarellos, dixo que non deixou de recibir “comunicacións de apoio de toda índole” desde “o día” que anunciou a súa proposta para nomear fillo adoptivo a Alonso Montero. Mostras de apoio de “todas as cores” e de xente de “todas as idades”, apostilou.

Pola súa banda, a voceira do Partido Popular, Elena Candia, a pesar de apoiar este nomeamento, afeoulle á alcaldesa “a súa falta de liderado e de consenso”.

Con respecto ao BNG, lamentou que “non fose capaz de aparcar con altura de miras ese radicalismo que impera en todo o que fai”.