O PSdeG perde na Deputación de Lugo a votación na que pedía a dimisión de Candia ao non sumarse o BNG
O PSdeG perde na Deputación de Lugo a votación na que pedía a dimisión de Candia ao non sumarse o BNG
Os socialistas presentaran unha moción para esixirlle á presidenta do PP lugués que se desculpase polo seu papel na investigación da Operación Pulpo e abandonase todos os seus cargos públicos
Os votos dos tres representantes do BNG na Deputación de Lugo, onde goberna en coalición co PSOE, impediron que saíse adiante unha moción presentada polos socialistas para reprobar a presidenta do PP lugués Elena Candia. Pretendían que abandonase todos os seus cargos públicos e que esixise desculpas polo seu papel na chamada Operación Pulpo, que investigou posibles anomalías na Deputación de Lugo.
Os socialistas acusaban a Candia de participar activamente «na estratexia de acoso político» que acabou con José Ramón Gómez Besteiro apartándose temporalmente da política pola súa condición de investigado nesta causa.
O presidente do organismo e líder provincial do PSdeG anunciaba o fracaso da súa proposta. Dez votos a favor do PSOE, 12 en contra do PP e abstención dos 3 representantes do BNG.
Foi o remate a un debate no que os socialistas acusaron de novo a Candia de presentar un anónimo que deu lugar a unha investigación a varios funcionarios e ao actual secretario xeral do PSdeG, José Ramón Gómez Besteiro. Besteiro era daquela presidente da Deputación. A investigación da chamada Operación Pulpo foi finalmente arquivada logo de doce anos.
No debate deste martes, a socialista Pilar García Porto reiteraba as súas acusacións. O popular Antonio Ameijide reiterou que o que fixo o PP foi levar á Fiscalía unha denuncia que partira de traballadoras da Deputación. O contrario, dixo, sería ser cómplices.
.png)
