O BNG comprométese a que máis mulleres lideren as listas da súa formación

A portavoz nacional do BNG, Ana Pontón, clamou este sábado por máis "lentes lila" á fronte dos gobernos locais para avanzar en igualdade nun momento en que crecen os "discursos negacionistas dos que queren a elas de novo na casa".

Nunha reunión en Santiago con alcaldesas e concelleiras, a líder nacionalista defendeu o "municipalismo feminista" que transforma concellos e impulsa mesmo un "urbanismo seguro para que non teñamos nunca máis medo por volver soas".

Soamente o 22 % dos concellos galegos teñen unha alcaldesa, detallou, e pediu conquistar "máis bastóns de mando" e que máis mulleres encabecen candidaturas municipais, ámbito no que o Bloque, dixo, dá exemplo porque lidera 35 gobernos locais e o 37 % teñen unha alcaldesa á fronte.

Unha porcentaxe máis alta que o das forzas estatais, destacou, que están "entre 15 puntos por baixo no caso do PSOE e 17 puntos por baixo no caso do PP".

Na véspera do 8M, Ana Pontón solidarizouse tamén coas mulleres de Irán.