Albares esíxelle a Israel a liberación do español Saif Abu Keshek, membro da flotilla

O ministro de Asuntos Exteriores, José Manuel Albares, esixiu a inmediata liberación dun cidadán de nacionalidade española, Saif Abukeshek, integrante da flotilla a Gaza interceptada este xoves por Israel, que sería "ilegalmente retido" e que estaría a ser trasladado a ese país.

Albares, en declaracións facilitadas aos medios, explicou que esta información trasladoulla a cónsul en Grecia, que se atopa en Creta para atender aos preto de trinta españois que foron desembarcados nesta illa despois de que este xoves a flotilla fose interceptada por Israel en augas gregas.

O ministro asegurou que tanto as embaixadas e consulados de España en Israel e Grecia "están plenamente operativos" para atender a todos os españois afectados e prestarlles a protección legal que requiran así como "obter a liberación e a volta a España tan pronto como sexa posible".

Esta nova flotilla de Global Sumud, que se dirixía a Gaza para romper o bloqueo e entregar axuda humanitaria, foi detida nas costas de Grecia con preto de 175 activistas de diferentes nacionalidades, entre elas unha trintena de españois.

Esta nova flotilla, con 58 embarcacións, partiu de Barcelona o pasado 15 de abril, nun novo intento de entregar axuda humanitaria despois de que o ano pasado, en outubro, fose detida outra similar na que viaxaban máis de 60 españois

Israel acusa ao español e máis a outro activista de axudar ou expresar o seu apoio a Hamas

 O Ministerio de Exteriores de Israel acusa aos dous activistas da Flotilla de facilitar transferencias financeiras ao grupo islamita palestino Hamas, no caso do palestino-español Saif Abu Keshek, e de mostrarlle o seu apoio no do brasileiro Thiago Ávila.

Israel decidiu levar a ambos a territorio israelí para interrogalos, no caso de Abu Keshek como "sospeitoso de pertencer a unha organización terrorista" e no de Ávila como "sospeitoso de actividades ilegais", segundo informou Exteriores este venres nas súas redes sociais.

Nun comunicado enviado a EFE, Exteriores indica que Abu Keshek coordinou "a comunicación entre as organizacións internacionais que participan nas flotillas e altos cargos de Hamas".