O Barcelona gaña en Praga e achégase ao Top 8 (2-4)

O Barcelona sumou unha traballada vitoria (2-4) en Praga ante un combativo Slavia e mantén vivo o obxectivo de conseguir o pase directo aos oitavos de final da liga de Campións, que podería certificar na última xornada da fase liga fronte ao Copenhague no Spotify Camp Nou.

O equipo catalán non saíu enchufado ó partido e os de Praga adiantaríanse no marcador nun saque de esquina mal defendido entre Balde e De Jong que aproveitaría o checo Kusej para adiantar ó Slavia. O Barça acusaba o gol e a baixa temperatura que facía en Praga e custáballe chegar á area contraria. Ata que apareceu Fermín para aproveitar un pase filtrado de De Jong e igualar o choque. Antes do descanso, de novo Fermín, cun disparo marca da casa, poñía por diante o Barcelona. Pero cando semellaba que o equipo culé iría ó intermedio con vantaxe no marcador, igualarían os de Praga, de novo nun saque de esquina, cun autogol de Lewandoski.

Na segunda metade os de Flick foron pola vitoria. Pese a lesión de Pedri  pecharon na súa área ao equipo checo. Coa entrada ó terreo de xogo de Rashford e Dani Olmo melloraron as súas prestacións ofensivas e sería este último o que colocaría o 2–3 cun marabilloso disparo desde a frontal da área. Despois aparecería Lewandoski para anotar o cuarto tanto blaugrana aproveitando un bo centro de Rashford. Sería o tanto que pecharía unha importante vitoria do equipo culé que deberá certificar o seu Top 8 na última xornada da fase liga.