O arcebispo de Santiago convida a León XIV a visitar a cidade

O arcebispo de Santiago, Francisco José Prieto, convidou o papa León XIV a visitar a capital galega "de novo", xa que estivo nela durante a súa mocidade. Así o trasladou o representante da diocese preguntado polos medios despois de presentar a memoria de actividades da Igrexa en Galicia 2023.

Monseñor asegurou que lle fará a mesma invitación que lle fixo no seu momento a Francisco e espera que "en canto teña oportunidade poida visitar a cidade como peregrino". "Lembrareille que o Apóstolo Santiago espera que o seu amigo Pedro o poida vir visitar", confirmou.

Ademais, lembrou que teñen no horizonte o Ano Santo 2027 polo que esperan poder contar coa visita do papa que, asegura, ten unha "grande experiencia na súa traxectoria como misioneiro da igrexa universal".

Nesta liña avanzou que asistirá á misa do comezo do seu ministerio, o vindeiro domingo, pero recoñeceu que "non será fácil" facerlle chegar a proposta ese mesmo día. Con todo, asegura que tratará de facerlla chegar "o máis pronto posible".