Nova pelexa ás portas dun 'after' conflitivo de Lugo
Un home tivo que ser trasladado ao hospital logo de recibir unha malleira e quedar malferido tirado no chan
Os veciños levan tempo denunciando a situación e piden que se faga un maior control das licenzas coas que contan estes locais e que non se axustan á actividade que desenvolven
Nove da mañá, e a puñada limpa en plena rúa. Na pelexa participan varias persoas, unha delas tras recibir varios golpes acaba malferido na chan e o resto de implicados foxen do lugar. A escena gravouse de novo ás portas deste after. Un establecemento que acumula numerosas denuncias e onde as pelexas se repiten todas as semanas.
"Están aquí borrachos tirándose e pegándose. Que fan a policía e o Concello?, que precinten o bar", conta un veciño.
Hai dúas semanas a policía fixo unha nova redada, pero este tipo de intervencións non intimida nin a propietarios nin clientes.
"Atoparon moitas infraccións como exceso de ocupación, armas brancas e consumo de drogas", explica Fernando Toubes da Plataforma SOS Milagrosa.
Os veciños están cansos, teñen medo e problemas para conciliar o sono.
"Todos os días e as fins de semana peor, aquí estamos que a xente non aguanta", explica un veciño.
Os veciños levan tempo denunciando que a actividade do local nada ten que ver coa súa licenza. Chegaron a precintalo e pechalo pero sempre volve abrir.
"O que pasa é que si o concello permite unhas licenzas para facer unha actividade totalmente distinta e ao mesmo tempo prexudica a veciñanza", engaden desde a Plataforma SOS Milagrosa.
Piden unha maior implicación das administracións, máis control das licenzas e horarios e tamén policial. Os problemas con este establecemento veñen de vello, desde o 2007.
