No triángulo máxico do entroido manteñen as restricións previas ao protocolo da Xunta
No triángulo máxico do entroido manteñen as restricións previas ao protocolo da Xunta
En Laza suspenden os folións e a repartición de comida
Xinzo e Verín non organizarán desfiles nin contratarán orquestras
O protocolo de Entroido aprobado polo comité clínico non vai alterar os plans no triángulo máxico. Xinzo, Verín e Laza optan por programacións máis restritivas que as que permite a Xunta para evitar aglomeracións.
No caso de Laza, non se organizarán folións nin haberá repartición de comida. Trátase, din, de evitar situacións en que é inviable delimitar espazos ou itinerarios e controlar a xente para que respecte as distancias de seguridade, as medidas hixiénicas ou o uso da máscara.
"Só no caso de que este (o protocolo) fose máis restritivo, nós modificariamos. Como somos nós máis precavidos, o acordo foi manter a mesma situación", explica Moncho Barreal Novo, alcalde de Laza.
Xinzo e Verín
En Xinzo e Verín tampouco cambia nada. Non se arriscan a contratar grandes orquestras nin a organizar desfiles polas dificultades de control.
"O protocolo permite todo pero que sexamos o poli malo os concellos, e os concellos xa asumimos moitas veces competencias impropias, escaseza de recursos... e non podemos facer o que nos gustaría facer", subliña Elvira Lama Fernández, alcaldesa de Xinzo de Limia.
Haberá, iso si, atraccións de feira. "Teñen unha zona ampla, e imos facilitarlles todo porque eles teñen os seus propios protocolos", explica a alcaldesa.
