No barrio vigués de Teis denuncian que levan anos con pragas de cascudas nas súas casas
Os veciños reclaman ao Concello medidas contundentes para eliminar estes insectos
A presenza de cascudas desespera a veciñanza de Teis, en Vigo.
No barrio das Flores denuncian que levan anos con este problema, que xa é unha praga, e que a situación empeora agora, coa chegada da calor na primavera.
Pelexan contra as cascudas con insecticidas, trampas e barreiras, pero din que sempre perden, así que piden axuda para que desinfecten a zona.
Antonia, unha veciña de Teis, conta que "todos os días recóllense a paladas. Normalmente eu poño insecticida e morren pero veñen máis mañá".
E así están boa parte das casas do barrio das Flores, en Teis. Din que hai cousa de cinco anos que conviven coas cascudas:
"Un día aparecen no desagüe da ducha, outra vez no vertedoiro, outra vez no mesado da cociña".
"Levántome e sempre atopo na cociña, como mínimo cinco e no cuarto de baño".
"Atopas bichos no medio do corredor. Atopas cascudas, que non morden, pero é un fastidio pisar unha cascuda descalza".
E contan os traballos que pasan e os cartos que gastan para tentar desfacerse delas:
"Teño aparellos de todo tipo, estes que emiten ondas, fumigo, boto spray tipo laca e nada".
"Contratamos unha empresa especializada e non serviu de nada. Un mes sen elas e despois volven outra vez".
Así que desesperan, sobre todo agora, cando chega a calor:
"Chega a primavera e isto é unha praga. Un día e ao seguinte outra vez".
En distintos puntos do barrio de Teis os técnicos municipais deixan unhas marcas nas zonas tratadas.
Desde o Concello de Vigo explican que nesta época e nesta zona están reforzando a desinfección, pero din que o problema está no interior das casas, onde non poden tratar. Os veciños discrepan:
"Vemos como nos entran na casa desde fóra".
"O problema está fóra".
E na asociación de veciños teñen constancia de que o problema se estende:
"Non só no barrio, tamén hai en Sanjurjo Badía, en San Pablo, Espiñeiro, hai cascudas en todos os lados", asegura Julio González, presidente Asociación Veciños de Teis.
Din que é molesto e insalubre, e reclaman medidas máis contundentes que os axuden a controlar e eliminar a praga de cascudas na zona.
