Seguridade dixital, novos e maiores apenas toman conciencia dos riscos tecnolóxicos
Na cátedra da USC e o INCIBE avalían os riscos e ofrecen solucións para empresas e particulares e aseguran que compre un marco xurídico que protexa os dereitos das persoas fronte aos posibles usos negativos da tecnoloxía
"Todos imos ser atacados", recalca de entrada Isabel Neira Coordinadora de Transferencia da cátedra da USC-INCIBE. Partindo desta premisa desde a cátedra seguen procurando que tanto os cidadáns en xeral coma as empresas, sobre todo as pequenas, se protexan máis e mellor.
Lembra que igual que houbo axudas para o kit dixital, "agora hai axudas do Ministerio, que se poden pedir para o kit de protección de ciberseguridade e tamén hai formación que ten o INCIBE e que temos na Cátedra".
No Congreso que organizan estes días en Santiago, os especialistas avalían tamén os retos de futuro en canto á seguridade dixital. "A día hoxe xéranse imaxes moi realistas con Intelixencia Artificial e vai ser o gran reto seguramente das próximas décadas", di Antonio Cebreiro, manager de seguridade da información.
Desde o punto de vista xurídico, José Julio Fernández, Catedrático de Dereito da USC, di que "o máis importante é garantir os dereitos fundamentais, a protección de datos, a intimidade, o dereito á propia imaxe, a honra".
"Os novos non se preocupan da ciberseguridade, pero son vítimas na mesma porcentaxe que os maiores; non fan contrasinais seguros, non protexen os seus datos en Internet".
Máis aló da necesidade dun regulamento legal da tecnoloxía, din que cómpre unha maior concienciación sobre o que facemos cada un de nós no mundo dixital, para evitar correr riscos ou viralizar información falsa. Porque os estudos evidencian que hai moito por facer calquera que sexa a idade dos usuarios, remarca Isabel Neira.
