Manuel Guaita e Manuel Touza, premio Arquitectura para un mundo mellor
Os dous enxeñeiros da madeira recibiron o galardón pola súa influencia "na configuración da nova arquitectura galega"
Os enxeñeiro Manuel Guaita e Manuel Touza recibiron este sábado o IV premio Arquitectura para un mundo mellor no Hotel Monumento San Francisco de Santiago.
Con estes galardóns, o Colexio Oficial de Arquitectos de Galicia (COAG) quere poñer en valor as achegas doutros membros da sociedade á arquitectura e ao urbanismo.
Desta volta, distinguiu dous profesionais do ámbito da enxeñería polo seu “intenso labor docente, divulgativo e investigador en relación coa tecnoloxía e construción en madeira durante os últimos 25 anos en Galicia”.
Construción en madeira
Durante o acto, a arquitecta da oficina técnica do Consorcio de Santiago, Idoia Camiruaga, salientou a traxectoria de ambos os dous premiados.
"Son heroes que entenden que a madeira é o territorio, que é a base de conexión entre a terra e o que creamos".
Pola súa banda, o decano do COAG, Luciano Alfaya, dixo que co seu traballo contribuíron a difundir as posibilidades deste material e a incorporalo ao proceso construtivo.
"Influíron desde a súa disciplina na configuración da nova arquitectura galega e na visión do potencial do noso sector forestal".
O enxeñeiro agrónomo Manuel Guaita, catedrático da Universidade de Santiago e docente na Escola Politécnica de Enxeñería de Lugo, é director da Plataforma de Enxeñería da Madeira Estrutural (PEMADE).
Pola súa banda, o enxeñeiro de montes Manuel Touza é técnico no Centro de Innovación e Servizos Tecnolóxicos da Madeira de Galicia (CIS-Madeira) da Axencia Galega da Industria Forestal (XERA).
