Muhamad Mustafa, nomeado primeiro ministro polo presidente palestino para formar goberno
Mohamed Shtayeh presentou a dimisión de todo o seu goberno o pasado 26 de febreiro
O presidente palestino Mahmud Abbas, co novo primeiro ministro Muhamad Mustafa (Reuters)
O presidente palestino Mahmud Abbas designou este xoves o economista Muhamad Mustafa como primeiro ministro da Autoridade Nacional Palestina (ANP) e encargoulle formar un novo goberno tras a renuncia do anterior ministro hai tan só dúas semanas.
"O Presidente do Estado de Palestina Mahmud Abbas nomeou este xoves pola tarde o Dr. Muhamad Mustafa para formar o décimo noveno goberno, dentro do prazo previsto na Lei Fundamental Modificada de 2003 e as súas emendas", informou a axencia oficial palestina Wafa.
A medida é parte dos esforzos de Abbas por reformar a ANP cun goberno tecnócrata que poida asumir o control da Franxa de Gaza cando remate a guerra, algo que está nos plans dos EUA para o futuro do enclave, pero non nos do primeiro ministro israelí Benjamin Netanyahu.
Cun chamado á "reconciliación nacional", o aínda primeiro ministro en funcións Mohamed Shtayeh presentou a dimisión de todo o seu goberno o pasado 26 de febreiro “á luz dos acontecementos políticos, de seguridade e económicos relacionados coa agresión na Franxa de Gaza e a escalada sen precedentes en Cisxordania”.
A elección de Mustafa era a que se manexaba en todos os escenarios, un perfil do agrado dos EUA, un economista doutorado na Universidade George Washington de EUA que ocupou postos de relevancia no Banco Mundial e mantén boa relación con funcionarios dese país e é un próximo de confianza de Abbas.
Desde 2005, era o presidente do Fondo de Investimento de Palestina e no pasado tamén foi o asesor económico de Abbas, ministro de Economía e mesmo viceprimeiro ministro dun breve goberno de unidade nacional no 2014 para a reconstrución de Gaza tras a guerra dese ano, polo que pode ser unha figura aceptable para Hamas.
Tamén forma parte do Comité Executivo da Organización de Liberación de Palestina desde 2022.
Mustafa celebrou consultas con posibles membros do gabinete nas últimas semanas e espérase que elixa un grupo de tecnócratas non afiliados ao partido Fatah do presidente Abbas, que dominou historicamente a ANP e goberna en zonas reducidas de Cisxordania ocupada.
O novo goberno seguirá baixo o mando de Abbas, de 88 anos, con problemas de saúde, acusado de autoritario e corrupto, que non se somete ás urnas desde 2005, coa súa popularidade esborrallándose en cada enquisa.
En decembro de 2023, un 60 % dos palestinos apoiaba a disolución da ANP e o 92 % a renuncia de Abbas, segundo unha sondaxe do Centro Palestino de Investigación de Políticas e Enquisas.
O apoio a Hamas en Cisxordania subiu ao 60 %, mentres que un 16 % optou por un goberno de unidade sen Abbas, un 7 % por manter a ANP no seu estado actual e só un 3 % se decantou pola fórmula que toma forma co modelo que impuxeron os EUA: un Executivo de cohesión nacional con Abbas á fronte.
Israel presentou en febreiro o seu plan de posguerra para Gaza, que prevé o control de seguridade israelí, para que lle permita realizar incursións para deter "sospeitosos de terrorismo" como fai en Cisxordania, pero cede o control civil do enclave a "palestinos afastados de entidades que apoien o terrorismo", pechando a porta a Hamas.
Netanyahu oponse tanto ao retorno da ANP a Gaza como á posibilidade dun Estado palestino, en contra da postura que defenden os EUA ou a Unión Europea.
A ANP gobernou na Franxa de Gaza ata 2007, cando Hamas tomou pola forza o poder do enclave tras fracasaren os intentos dun goberno de unidade nacional con Fatah, despois de que o grupo islamista vencese nas lexislativas de 2006.
