Mrsic: "Se o Barça ten algo de Maljkovic, perderá o partido"
Maljkovic, antes dunha gran competición, perdía o último partido
Veljko Mrsic, adestrador do Breogán, advertiu do potencial do Barcelona, ao que visitará o domingo no Palau Blaugrana, pero tamén lembrou que despois da cita cos lucenses o cadro catalán afrontará a Copa do Rei e desexou que teña algo do adestrador serbio Bozidar Maljkovic e perda o último partido antes dun gran torneo.
"Levan nove partidos seguidos gañando en ACB e, se teñen algo de Bozidar Maljkovic, perderán o próximo partido porque el, antes dunha gran competición, perdía o último partido. Oxalá que Saras (Jasikevicius, adestrador do Barça) tente facer o mesmo", comentou nunha conferencia de prensa.
O Barcelona afrontará o partido tras pasar o rodete ante a Virtus Bolonia (75-92) este xoves na Euroliga:
"Fixeron un moi bo adestramento, xogando un partido moi, moi bo, ninguén xogou máis de 20 minutos, fixeron tres cuartos perfectos e pode ser o mellor Barcelona da tempada", sinalou.
Un partido perfecto é o que, na súa opinión, necesita o seu equipo para poder dar a badalada no Palau:
"Para gañar alí temos que facer un partido perfecto. Non podemos ter baixóns de concentración en defensa e ataque, temos que ser un bloque corenta minutos, non perder a cabeza en ningún momento. A ver se podemos repetir o partido da primeira volta (perderon por catro puntos) e tomamos boas decisións os 40 minutos. Así teremos opcións", valorou.
