Morren dous irmáns en Lugo intoxicados por fume na súa vivenda

Dous irmáns residentes en Vilar de Meilán, en Lugo, apareceron mortos tras declararse un incendio no interior da súa casa. Ata o lugar desprazáronse varias patrullas policiais, que atoparon os corpos dos falecidos dentro da vivenda no medio dunha fumareda.

Manuel Arias, voceiro da comisaría de Lugo: "Un deles estaba sentado e outro deitado. Primeiro ventilouse para que saíse o fume, comprobaron que non había perigo e constataron que estas dúas persoas estaban falecidas".

Un curtocircuíto, motivado por unha deficiente instalación eléctrica, puido ser a orixe das lapas, que á súa vez provocarían o monóxido de carbono que se cre que inhalaron as vítimas ata a súa morte. A policía investiga agora as causas do suceso.

Manuel Arias, voceiro da comisaría de Lugo: "A instalación eléctrica non estaba en condicións óptimas, o que puido provocar un curtocircuíto. Había un colchón cerca, e a súa combustión puido producir tanto fume como para provocarlles a morte ao inhalalo". 

Os cadáveres dos dous irmáns, de 48 e de 54 anos, foron trasladados ao HULA para practicarlles a autopsia.