As chuvias duplican o nivel de auga encorada en Eiras nunha semana
Abastece a área de Vigo e pasa de mínimos históricos a preto do 70% da súa capacidade
Os encoros que abastecen Ferrolterra e a área da Coruña seguen moi baixos
Máis de 400.000 persoas dependen da auga deste encoro. Todos os que viven na área de Vigo e nos concellos limítrofes de Mos, O Porriño, Redondela e Salceda de Caselas. Hai dez días a posibilidade de que chegaran a sufrir restricións non parecía imposible de continuar a seca. O encoro acadara mínimos históricos. Pero nunha semana de choivas pasou de estar ao 33% de capacidade a rozar o 70%.
O cambio para mellor que deixaron as precipitacións en Eiras non se notou noutros encoros de abastecemento de auga da demarcación Galicia-Costa. O de Cecebre que lles dá auga a outras 400.000 na área da Coruña apenas se beneficiou das borrascas. E o das Forcadas que abastece 135.000 persoas en Ferrolterra segue en situación límite, en mínimos históricos.
Tanto estas áreas como as concas do Lerez e do Anlllóns ata sumar 59 concellos están en alerta por escaseza de auga. En todos eles se adoptaron medidas para reducir o consumo. A súa situación revisarase na próxima reunión da Oficina Técnica da Seca.