Dous directivos españois de Siemens e os seus tres fillos morren nun accidente de helicóptero en Nova York

Unha familia de españois faleceu ao estrelarse un helicóptero no río Hudson, en Nova York. As seis persoas que ían a bordo morreron cando o helicóptero se precipitou ao río Hudson preto do baixo Manhattan na cidade de Nova York. A falta de confirmación oficial da embaixada española, os falecidos son un directivo de Siemens, a súa muller e tres fillos e mais do piloto.

É a familia de Agustín Escobar, natural de Puertollano (Cidade Real), que foi nomeado responsable da división de mobilidade ferroviaria en Siemens o pasado decembro, despois de ocupar o posto de CEO de Siemens España durante dous anos.

A súa esposa, Mercè Camprubí Montal, ocupaba a dirección de Comercialización Global en Siemens Energy e pertencía a unha coñecida familia de Barcelona. O seu irmán Joan foi candidato en 2024 a presidir o F. C. Barcelona, e tanto o seu avó, Agustí Montal i Costa, coma o seu bisavó, Agustí Montal Galobart, foron presidentes deste club de fútbol.

Os falecidos, minutos antes de subir ao helicóptero, nunha fotografía tomada pola propia empresa

"Estamos profundamente entristecidos polo tráxico accidente de helicóptero no que Agustín Escobar e a súa familia perderon a vida. O noso máis sentido pésame a todos os seus seres queridos", sinalou un portavoz de Siemens.

O alcalde, Eric Adams, confirmou que non houbo sobreviventes no accidente e que se trataba dunha familia e un piloto de España, e especificou que había dous adultos e tres nenos entre os pasaxeiros, ademais do piloto. 

O helicóptero pertencía a unha empresa turística chamada New York Helicopter Tours, que ofrece visitas panorámicas de Nova York desde o ceo. O director executivo da empresa, Michael Roth, dixo a ese medio estar "devastado" e agregou: "Non vin nada así nos 30 anos que levo no negocio dos helicópteros".

Levaba 15 minutos de voo

Segundo o rastrexo da aeronave en Flight Radar, no momento do accidente o helicóptero (un Bell 206) levaba 15 minutos de voo e 6 quilómetros percorridos.

O aparello saíu do heliporto de Downtown Manhattan, dirixiuse cara ao sur antes de voar cara ao norte ata a ponte George Washington e despois volveu ir cara ao sur seguindo a costa de Nova Jersey, cando perdeu o control á altura de Hoboken.

A nave estrelouse ás 15:15 hora local dun día con temperaturas moi baixas (ao redor de 5 graos centígrados), e, segundo as imaxes filtradas por varias televisións, pódese ver un helicóptero sen as aspas, coa cola partida, caendo estrepitosamente ao río. 

A caída estrepitosa do helicóptero á auga mobilizou mergulladores do corpo de bombeiros e da Policía de Nova York e da veciña Nova Jersey. Recuperaron catro cadáveres, mentres que as outras dúas persoas faleceron posteriormente no hospital.

O presidente do Goberno Pedro Sánchez transmitiu unha mensaxe de condolencia.

Las noticias que hoy nos llegan del accidente de helicóptero en el río Hudson son devastadoras.

Cinco españoles de una misma familia, tres de ellos niños, y el piloto han perdido la vida. Una tragedia inimaginable.

Acompaño en el dolor a los allegados de las víctimas en este…

— Pedro Sánchez (@sanchezcastejon) April 10, 2025

O presidente Donald Trump, expresou o seu pesar polo "terrible accidente" dun helicóptero que se estrelou este xoves nas augas do río Hudson, en Nova York, no que perderon a vida cinco españois e o piloto.

"Terrible accidente de helicóptero no río Hudson. Parece que seis persoas, o piloto, dous adultos e tres nenos, xa non están connosco. As imaxes do accidente son horribles. Deus bendiga as familias e amigos das vítimas", escribiu o mandatario na súa conta de Truth Social.

Trump tamén asegurou que o secretario de Transporte Sean Duffy e o seu persoal estaban a traballar niso e que pronto darían máis detalles sobre o ocorrido.

Polo menos 32 persoas morreron en accidentes de helicóptero en Nova York desde 1977; o máis recente, en 2019, cando un helicóptero utilizado para viaxes executivas chocou contra o teito dun rañaceos de Manhattan nun espazo aéreo restrinxido e o piloto morreu. 

Trátase, polo número de vítimas, do peor accidente deste tipo desde 2018, cando morreron cinco dos seis ocupantes dun helicóptero que despegara de Nova Jersey e caeu ás augas xeadas do East River, o outro río que baña Manhattan.