Morre un ferrolán nunha patrulleira da Garda Civil durante un rescate nas Canarias
O traballador, de 60 anos e empregado da firma Gauzón Ibérica, morreu tras sufrir un desmaio
Imaxe de arquivo da patrulleira Río Tajo da Garda Civil
Un operario naval de 60 anos, natural da comarca de Ferrolterra, faleceu mentres traballaba a bordo do buque da Garda Civil Río Tajo. O suceso tivo lugar cando a patrulleira oceánica atopábase en augas da Gomera (Illas Canarias) participando nun operativo de interceptación e rescate dun caiuco.
O falecido era empregado de Gauzón Ibérica, unha empresa con sede central en Ferrol que xestiona o mantemento e a operatividade das tres patrulleiras oceánicas da Benemérita. Segundo informaron fontes próximas ao caso, o home sufriu un desmaio repentino, o que provocou que se golpease a cabeza contra o casco do buque ao caer ao chan.
A pesar da inmediata intervención dos servizos médicos, non se puido facer nada por salvar a súa vida. Tras a correspondente autorización xudicial, o cadáver foi trasladado para a realización da autopsia, que determinará se o falecemento foi causado polo impacto ou por unha patoloxía previa.
A Asociación Unificada de Gardas Civís (AUGC) emitiu un comunicado lamentando o accidente e trasladando as súas condolencias. A organización sinalou que permanecerán á espera de que a Policía Xudicial e a Inspección de Traballo aclaren as circunstancias exactas do suceso mediante a investigación correspondente.
Gauzón Ibérica, ademais da súa sede principal en Galicia, conta con delegacións en Madrid, Cádiz e Gran Canaria para soporte técnico das unidades de vixilancia marítima da Garda Civil en todo o territorio nacional.
