Morre un condutor de 26 anos tras sufrir unha colisión cunha furgoneta na OU-533, no Bolo
O acompañante saíu ileso. Os ocupantes da furgoneta, dous adultos e dous menores de idade, teñen feridas leves
Garda Civil
Un condutor de 26 anos faleceu este martes tras sufrir un accidente consistente nunha colisión cunha autocaravana cando circulaba pola comarcal OU-533 ao seu paso polo termo municipal do Bolo.
Segundo informou a Garda Civil, o contratempo fatal produciuse minutos antes das catro da tarde na estrada comarcal que comunica A Gudiña coa Rúa.
Como consecuencia, o condutor do turismo, madrileño, morreu; mentres que o acompañante saíu ileso. Os ocupantes da furgoneta, dous adultos e dous menores de idade, teñen feridas leves.
O falecido levaba posto o cinto de seguridade, especifica o comunicado.
O Servizo de Urxencias Sanitarias de Galicia-061 mobilizou o helicóptero medicalizado con base en Ourense ata o lugar. Tamén acudiron os Bombeiros de Valdeorras, o GES da Veiga, a Garda Civil de Tráfico e a Agrupación de Voluntarios de Protección Civil do Bolo.
Unha vez no punto, os servicios de emerxencias liberaron ao condutor do turismo, aínda que nada se puido facer por evitar o seu falecemento. Un segundo ocupante do coche tivo que ser evacuado ata o hospital de referencia, mentres que os da autocaravana foron atendidos no punto.
