Morre Giorgio Armani, o rei da moda italiana, aos 91 anos

O deseñador Giorgio Armani, coñecido como o rei da moda italiana, morreu este xoves aos 91 anos en Milán, acompañado da súa familia e do seu compañeiro nas dúas últimas décadas, Leo Dell’Orco.

Así o confirmou o grupo empresarial Armani nun comunicado no que destacou a súa figura como creador, fundador e motor incansable da firma.

“Con infinito pesar, o grupo Armani anuncia o falecemento do seu creador, fundador e incansable motor: Giorgio Armani. O señor Armani, como sempre lle chamaron con respecto e admiración os seus empregados e colaboradores, faleceu tranquilamente, rodeado dos seus seres queridos. Incansable, traballou ata os seus últimos días, dedicándose á empresa, ás coleccións e aos novos proxectos en curso”, sinala a nota.

Unha carreira marcada pola elegancia

Hai unhas semanas, pouco antes de cumprir os 91 anos, unha infección pulmonar obrigouno a hospitalizarse e a gardar repouso na súa casa da Via Borgonuovo de Milán.

Ese contratempo fíxolle perder o desfile masculino de alta costura en xuño, algo moi pouco habitual nun creador que nunca deixou os obradoiros.

Armani converteuse nunha lenda absoluta da moda e nun referente universal do estilo contemporáneo. Situou a muller e a súa liberdade no centro das súas creacións e inventou estilos sempre recoñecidos pola súa elegancia intemporal.