Trump di que o sospeitoso do tiroteo actuou por "motivos anticristiáns"

O presidente dos Estados Unidos, Donald Trump, asegura que o sospeitoso do tiroteo ocorrido na cea de correspondentes da Casa Branca actuou movido por un "odio" profundo cara aos cristiáns.

Nunha entrevista telefónica coa cadea Fox News, o mandatario describiu o atacante como un "tipo moi problemático", cun transfondo relixioso radical, baseándose nun manifesto e informacións solicitadas polas autoridades.

"Cando les o seu manifesto, odia aos cristiáns. Iso é seguro. É un odio forte, anticristián", sinalou.

Segundo o republicano, a propia familia do sospeitoso estaba ao tanto das súas dificultades e tendencias violentas.

"A súa familia sabía que tiña dificultades. Talvez deberían denuncialo cun pouco máis de firmeza. Probablemente é algo difícil de facer, supoño, pero é unha situación moi, moi mala".

Pola súa banda, o fiscal xeral interino dos Estados Unidos, Todd Blanche, revelou que as investigacións preliminares suxiren que o detido tiña como obxectivo altos cargos do Goberno, incluído "probablemente" o presidente.

En declaracións á NBC, asegurou que os dispositivos electrónicos e as entrevistas cos seus coñecidos apuntan a un ataque dirixido contra membros da Administración.

O sospeitoso

O arrestado, identificado como Cole Allen, de 31 anos e natural de California, estudou enxeñería mecánica nunha universidade privada pero traballaba como profesor.

As autoridades reconstruíron o traxecto do atacante, que viaxou en tren desde Os Ánxeles a Chicago e de alí a Washington D.C., onde se rexistrou no hotel un ou dous días antes do evento.

O fiscal xeral confirmou que o sospeitoso comprou as dúas armas que portaba nos últimos 24 meses e que non está a colaborar. Agárdase que o luns compareza ante un tribunal no distrito de Columbia para enfrontar cargos formais.

A evidencia inicial indica que actuou só, pero esta interpretación, ao igual ca os motivos do ataque, podería cambiar a medida que avacen as pescudas.

Arestora atópase baixo custodia hospitalaria para unha avaliación pero non está ferido. O Servizo Secreto reduciuno no vestíbulo do hotel Washington Hilton tras activar os protocolos de emerxencia.

Tras evacuar o presidente, a primeira dama e o resto do gabinete presente no salón, desaloxouse a sala onde se celebraba a cea anual de correspondentes da Casa Branca.