Trump, evacuado da cea coa prensa en Washington tras un tiroteo

O presidente estadounidense, Donald Trump, foi evacuado de xeito abrupto este sábado da tradicional cea da asociación de correspondentes da Casa Branca despois de que un home armado, que foi interceptado e detido, intentara entrar ao evento.

Os centos de asistentes á cita, que incluían á plana maior do Goberno, tiveron que ser evacuados. Trump explicou minutos despois, nunha conferencia de prensa na Casa Branca, que o atacante era un "tolo" e un "lobo solitario".

Segundo confirmou, non chegou a traspasar o perímetro de seguridade no que o mandatario ceaba acompañado da primeira dama, Melania Trump, o vicepresidente, JD Vance, e centos de xornalistas e membros do mundo da política de Washington.

Foi identificado como Cole Tomas Allen, un mestre de 31 anos e natural de California. As forzas de seguridade sospeitan que estaba aloxado no hotel Hilton, onde se desenvolvía a velada.

WATCH: The moment President Trump was escorted out of the White House Correspondents’ Dinner after loud noises were heard. pic.twitter.com/dMt46TGhlo

— Donald J Trump Posts TruthSocial (@TruthTrumpPost) April 26, 2026

A fiscal xeral de Distrito de Columbia, Jeanine Pirro, indicou nunha comparecencia posterior que o atacante ingresou no perímetro de seguridade armado cunha escopeta.

O home está "vivo", hospitalizado e baixo vixilancia tras seren neutralizado nos mesmos corredores do hotel. Un membro do Servizo Secreto, responsable da seguridade do presidente, foi alcanzado no chaleco antibalas pero atópase ben.

O presidente dos Estados Unidos compartiu, a través da súa rede Truth Social, unha serie de imaxes e un vídeo que amosan o momento da detención e a persecución do sospeitoso do tiroteo.

As mensaxes publicadas polo mandatario carecen de texto adxunto e limítanse á difusión de material visual sobre o incidente. Na comparecencia posterior, Trump dixo que o home "foi interceptado por algúns membros moi valentes do Servizo Secreto, que actuaron con moita rapidez".

"Un axente resultou ferido de bala, pero salvouse grazas a que levaba un chaleco antibalas de excelente calidade. Disparáronlle a pelacorpo cunha arma moi potente, e o chaleco cumpriu a súa función. Acabo de falar co axente e atópase moi ben", engadiu Trump.

Os axentes, que evacuaron o presidente e o resto de altos cargos presentes na cea, detectou o individuo nun dos controis de seguridade do hotel antes de detelo.

Tres detonacións

Un xornalista de EFE que se atopaba na cea explicou que se escoitaron tres detonacións fóra da sala de baile onde se celebraba a cea, presidida por unha mesa sobre un escenario na que estaban sentados o presidente e a primeira dama.

Trump e os membros do Goberno foron rapidamente evacuados polo Servizo Secreto, mentres o resto de convidados refuxiouse debaixo das mesas. Tras uns minutos de incerteza, os axentes de intelixencia informaron que era seguro abandonar o lugar.

Esta era a primeira vez que Trump asistía como presidente á Cea de Correspondentes, un evento anual que organizan os xornalistas que cobren a Casa Branca para celebrar a liberdade de prensa.

O republicano, que mantén unha tensa relación cos medios de comunicación, boicoteouna durante o seu primeiro mandato. O magnate republicano anunciou que a cea se vai reaxendar para dentro dun mes.

Rivais políticos como o alcalde de Nova York, Zohran Mamdani, ou a veterana congresista demócrata, Nancy Pelosi, mostraron o seu apoio a Trump e condenaron a violencia nas súas redes sociais.