Morre ao caer desde a azotea dun hotel nas Palmas mentres facía unha autofoto
Estaba de costas á varanda tentando facer unha autofoto coa praia ao fondo, ao apoiarse perdeu o equilibrio e precipitouse ao baleiro dende unha altura de máis de 25 metros
Un home de 48 anos faleceu na madrugada do sábado ao domingo ao precipitarse ao paseo de Las Canteras, nas Palmas de Gran Canaria, desde a azotea dun hotel mentres trataba de facer unha autofoto.
Cando o establecemento xa ía cerrar, pasada a unha da mañá, estaba de costas á varanda da terraza tentando facer unha autofoto coa praia das Canteras ao fondo. Ao apoiarse perdeu o equilibrio e precipitouse ao baleiro dende unha altura de máis de 25 metros.
Testemuñas dos feitos e persoal do hotel deron a voz de alarma ás emerxencias, pero faleceu no acto como consecuencia do impacto. A Policía tomou declaración aos acompañantes do falecido e mantén aberta unha investigación para aclarar as circunstancias exactas da morte.
Todo apunta a un fatal accidente, e un estudo recentemente publicado a nivel mundial reflicte que cada trece días unha persoa falece facendo unha autofoto. Algunhas son inofensivas, pero moitas persoas non coñecen de límites cando se trata de conseguir a mellor foto, a imaxe máis perfecta para publicala despois nas redes sociais.
Por iso o número de mortes absurdas por este motivo non deixa de medrar. Nos últimos quince anos máis de 500 persoas morreron facendo unha autofoto. A súa idade media era de 24 anos e as principais causas destas mortes caídas desde alturas, atropelos ou afogamentos. A India lidera esta triste serie de falecidos, seguida dos Estados Unidos, Rusia e España.
