Mingueza despídese do Celta: "Foi unha honra defender estas cores"
O catalán, que aínda non se lle coñece equipo para o curso 2026-27, incidiu en que marcha “co corazón cheo de amizades”
O internacional español Óscar Mingueza despediuse este martes do Celta, co que finaliza contrato despois de catro tempadas xogando en Balaídos.
“Cheguei a Vigo coa ilusión de empezar unha nova aventura. Desde o primeiro día sentín o orgullo e a responsabilidade que era vestir a camiseta celeste. Intentei dar sempre o mellor de min e coa máxima ilusión para defender este escudo. Foi unha honra defender estas cores”, escribiu nunha emotiva carta.
O exfutbolista do Barcelona asegura marcharse “tranquilo” e “contento” de formar parte do equipo dirixido por Claudio Giráldez, a cal, conseguiu “escribir unha páxina na historia do club”.
“Devolvemos ao Celta dous anos seguidos a unha competición europea. Que bonito foi vivir noites europeas en Balaídos, escoitando o himno do Centenario”, subliñou.
Mingueza, peza clave no once de Giráldez, asume que lle custará esquecerse de Vigo, onde naceron os seus fillos Bruno e Luca:
“Vigo converteuse en algo máis que unha Cidade, converteuse nun fogar. Sempre vai haber un pedacito da nosa familia que pertencerá a esta terra”.
O catalán, que aínda non atopou equipo para o curso 2026-27, incidiu en que marcha “co corazón cheo de amizades”, así como con recordos e experiencias que son “para toda a vida”.
