A TVG retransmitirá todos os partidos de pretempada do Celta
A canle pública está en negociacións co Deportivo da Coruña para intentar emitir todo o calendario do verán
A Televisión de Galicia acompañará o RC Celta de Vigo desde o primeiro minuto da nova tempada. A TVG retransmitirá en directo os seis partidos de pretempada que o equipo vigués disputará entre o 18 de xullo e o 8 de agosto, ofrecendo á afección galega a oportunidade de seguir os primeiros pasos do equipo celeste antes do inicio dunha tempada que se presenta especialmente esixente.
A día de hoxe hai tres citas confirmadas das seis que se van disputar.
A primeira é o sábado 18 de xullo ás 20:30, hora galega, en Braga, fronte ao equipo luso. Será a estrea oficial da pretempada e o primeiro termómetro para medir o estado de forma do cadro de xogadores e ver as novas incorporacións.
Unha semana despois, o sábado 25 de xullo ás 20:00, o Celta debuta en Galicia para xogar ante o Sporting de Xixón no Campo da Lomba de Vilagarcía de Arousa. Un partido especial, nunha data simbólica para Galicia e ante un rival histórico.
A penúltima cita do calendario está prevista para o mércores 5 de agosto ás 20:00, coa visita ao Sassuolo, equipo da Serie A, que conta con catro xogadores mundialistas.
Ademais, os de Claudio Giraldez xogarán tamén o martes 28 de xullo, o venres 31 de xullo e pecharán a pretempada o sábado 8 de agosto. Estes tres partidos, que están á espera de rival e horario, tamén se poderán ver a través da Televisión de Galicia.
A CSAG segue negociando co Deportivo para poder dar tamén en aberto todos os partidos para os siareiros galegos, igual que a TVG acompañou o equipo en tempadas anteriores.
