Milleiros de persoas saen ás rúas de Santiago en solidariedade con Palestina
Unha gran marea humana participa na manifestación convocada pola Coordinadora Galega de Solidariedade con Palestina
Baixo o lema "contra o xenocidio e a ocupación" percorreron o centro compostelán ata a praza do Obradoiro
Pontón critica a ausencia do PP na marcha e Besteiro considera que nestes momentos "non cabe a indiferenza"
Unha gran marea humana participou este domingo en Santiago de Compostela na manifestación unitaria convocada pola Coordinadora Galega de Solidariedade con Palestina para condenar "o xenocidio e a ocupación" neste territorio por parte do Estado de Israel.
A marcha partiu pasadas as doce do mediodía da alameda da capital galega, onde se concentraron os manifestantes, en moitos casos portando bandeiras ou ataviados co pano palestino tradicional, un tempo antes do inicio da protesta.
Segundo a plataforma organizadora, subscribiron a convocatoria preto de 80.000 persoas, unha cifra que a policía local rebaixa a 15.000.
Unha faixa co lema "Galiza con Palestina. Contra o xenocidio e a ocupación" encabezou a manifestación, que percorreu as rúas do centro da cidade ao son de cánticos como "Non é unha guerra, é un xenocidio", "As nenas de Gaza non son unha ameaza" ou "Netanyahu, asasino".
Desde aí, continuaron avanzando ata desembocar na praza do Obradoiro, ao pé da catedral de Santiago, onde se ergueu un escenario para a lectura dos manifestos.
A cabeceira da manifestación. EFE/Lavandeira Jr.
Autodeterminación
No medio dunha praza ateigada, malia quedaren fóra milleiros de manifestantes por falla de espazo, sinalaron a Israel como "un perigo para toda a humanidade" e chamaron a facer valer o dereito de autodeterminación de Palestina.
Ademais, pedíronlle ao Goberno que rache todo tipo de relación bilateral co Estado xudeu.
En declaracións aos medios ao inicio da marcha, Óscar Valadares, membro da coordinadora, apuntou que esta protesta é "a culminación de dous anos de traballo", nos que organizaron máis de 1.100 convocatorias para denunciar a situación que se vive en Palestina.
"O que reclama, non Hamás, senón o pobo palestino, é unha solución xa para parar este xenocidio e que haxa dignidade e que haxa unha solución para a causa palestina", defendeu Sami Ashour, gazatí residente en Galicia, e parte tamén da coordinadora.
Ademais dun importante número de colectivos sociais, na marcha estiveron presentes dirixentes dos partidos da oposición en Galicia, o BNG e o PSdeG, ademais de cargos de Sumar, que subscribiron a protesta.
A praza do Obradoiro quedou pequena
Compromiso coa "dignidade"
A voceira nacional do BNG, Ana Pontón, asegurou que esta mobilización demostra o compromiso do pobo galego coa "dignidade" e a "humanidade", á vez que criticou que nin o PP nin a Xunta se sumasen a esta causa.
"Os galegos e as galegas saímos á rúa para falar por todo o pobo palestino que non pode facelo, por todas as persoas sepultadas debaixo das bombas e dos entullos", afirmou Pontón.
Ademais, insistiu en que o Goberno do Estado e a UE deben rachar todo tipo de relacións con Israel. Na súa opinión, en Palestina "está en xogo" o futuro da humanidade e do dereito internacional.
"Posición responsable"
Tamén participou o secretario xeral do PSdeG, José Ramón Gómez Besteiro, que avogou por adoptar unha "posición responsable" para condenar o xenocidio "e os xenocidas", nun momento no que "non cabe a indiferenza" e toca defender "a paz, a liberdade e a xustiza".
"É un clamor que lle chega á xente que padece o xenocidio, pero tamén aos xenocidas, aqueles que levantan eses muros, que sementan o odio, que xustifican a barbarie. Hoxe é un momento no que non cabe a indiferenza".
