Milleiros de migrantes cruzan a fronteira de Marrocos a Ceuta e o Goberno mobiliza o exército

Milleiros de persoas procedentes de Marrocos cruzaron este xoves de forma irregular polo espigón fronteirizo ata Ceuta, entradas que se suman a outras miles rexistradas a nado nos últimos días e ante as cales o Goberno central traballa para a "entrega" de todas estas persoas ao país veciño.

Ao redor das 12.30 horas deste xoves, miles de migrantes accederon á cidade autónoma desde Marrocos cruzando a pé polo espigón fronteirizo do Tarajal, unha situación que se repetiu horas despois, sobre as 15.30, con outros miles accedendo de forma irregular á cidade.

Unhas imaxes que lembran ás de 2021, cando entraron pola mesma vía máis de 10.000 persoas, e que chegan despois de dez días nos que xa se rexistraran entre 1.500 e 2000 entradas irregulares, neste caso a nado, segundo datos do Goberno ceutí.

As cifras desbordaron os medios da cidade, tanto das forzas e corpos de seguridade do Estado como dos recursos de atención humanitaria e de acollida como o Centro de Estancia Temporal de Inmigrantes, en cuxos arredores esperan xa máis de 1.000 persoas para ser atendidas.

Segundo os últimos datos do Ministerio do Interior, desde que empezou o ano ata o pasado 15 de xullo, as chegadas irregulares a toda España baixaran un 24,7% respecto ao mesmo período de 2025, en contraste coas entrada a Ceuta por vía terrestre -que inclúe os accesos a nado- que creceran máis do dobre, ata as 2.826.

A situación xa fora cualificada de "absoluta emerxencia humanitaria e social" esta mañá polo presidente de Ceuta, Jesús Vivas, que pediu ao Goberno que declarase a "emerxencia nacional" e un "mando único" ao Estado para facer fronte á situación.

Unha solicitude que o Executivo rexeitou explicando que non é posible activar a emerxencia de interese nacional por unha crise migratoria porque esta figura está contemplada para riscos naturais e tecnolóxicos como terremotos, inundacións ou incendios forestais.Pero si garantiu que o Executivo central traballa con máis recursos e efectivos para garantir tanto a seguridade e o control migratorio como a atención humanitaria necesaria.

As Forzas Armadas reforzarán á Garda Civil para manter a seguridade

As Forzas Armadas reforzarán á Garda Civil para manter a seguridade na cidade de Ceuta tras a chegada masiva de migrantes e farano no exercicio das súas competencias e aquelas que poidan resultar necesarias. Así o informaron este xoves fontes dos ministerios de Defensa e do Interior, que engaden que os efectivos mobilizados do Exército estarán coordinados polo mando de operacións e darán apoio á Garda Civil.

Respecto á Garda Civil, aos 60 efectivos da Agrupación de Reserva e Seguridade destinados permanentemente en vixilancia fronteiriza sumouse xa un pelotón adicional de 29 axentes e nas próximas horas incorporaranse dous pelotóns máis, con 40 efectivos.

Mentres, a Unidade de Seguridade Cidadá de Ceuta refórzase con 30 gardas civís procedentes de diferentes unidades de Andalucía. Ademais, enviaranse dous grupos de mergulladores (8 efectivos) do Grupo Especial de Actividades Subacuáticas (GEAS) desa mesma comunidade.Ás embarcacións do Servizo Marítimo destinadas en Ceuta (dúas medias e 4 tipo zodiac), uniranse o buque Duque de Ahumada.

Nos próximos días incorporaranse ao Servizo Marítimo cinco patróns de embarcación, tres mecánicos-mariñeiros e pilotos de drons. Pola súa banda, o Servizo Aéreo do instituto armado reforzarase cun helicóptero.

En canto a Policía Nacional, a Comisaría Xeral de Estranxeiría e Fronteiras enviou un equipo composto por 6 persoas para apoiar os labores de reseña e documentación. En Seguridade Cidadá, o grupo da Unidade de Intervención Policial e os efectivos da Unidade de Prevención e Reacción de Ceuta dobrarán quendas, mediante a dotación de xornadas extraordinarias.

Pedro Sánchez viaxa este venres para coñecer sobre o terreo a situación

O presidente do Goberno viaxará este venres a Ceuta para coñecer sobre o terreo a situación provocada pola entrada masiva de persoas procedentes de Marrocos.

Previamente, a través das redes sociais, Pedro Sánchez referiuse á situación e asegurou que o Goberno está centrado en dar unha resposta inmediata á situación e prepara todas as medidas necesarias para recuperar a normalidade canto antes.

Fontes do Ministerio do Interior detallaron que España e Marrocos acordaron "revisar e implementar medidas para a entrega, canto antes, de todas as persoas que entraron ilegalmente".

Unha decisión que foi cuestionada por entidades sociais como a Comisión Española de Axuda ao Refuxiado (CEAR), que advertiu que esta medida socava o dereito ao asilo.

O PP instou ao Goberno a activar o artigo 23 da lei de Seguridade Nacional para declarar a emerxencia e despregar ao Exército para facer fronte á crise e Abascal cualificou a situación dunha "invasión" da que culpou ao presidente do Goberno. Pola súa banda, a deputada de Más Madrid Tesh Sidi, pertencente ao grupo Sumar, sinalou a Marrocos por "utilizar a menores como arma contra España".