Medo á guerra nas bolsas de todo o mundo
Madrid cae un 3 % e as principais bolsas europeas arredor dun 4 %
Os mercados rusos tiveron que pechar cando perdían un 30 %
O medo á guerra causou estragos nos mercados bolsistas de todo o mundo. Os máis afectados, os rusos. Moscova e San Petersburgo tiveron que deixar de operar cando perdían un 30 %.
Os principais mercados europeos como Frankfurt, París , Milán e Londres caeron arredor dun 4 %. A bolsa de Madrid perdeu algo menos do 3 % e pechou en mínimos do que vai de ano. A banca e a industria foron os valores máis afectados.
A fuxida dos investidores con vendas masivas non é o único efecto alarmante para a economía tras o ataque de Rusia a Ucraína. A principal preocupación son as tensións inflacionistas pola suba dos prezos da enerxía. O prezo do gas disparouse un 60 % e o petróleo acadou o seu máximo desde 2014. O barril de Brent cotizou por riba dos 100 dólares.
