Case toda Galicia rexistra este mércoes máximas por riba dos 20ºC

Para soltar a chaqueta en Ourense fan falta unhas horiñas.

"Á mañá, por aquí vai frío. E á noite, tamén", di unha veciña mentres atravesa a ponte vella.

Tres graos e medio, exactamente, foi a mínima da noite, fronte aos 23 que se agardan para esta tarde. Non será só Ourense. Tamén hai previsión de chegar aos 23 graos na comarca do Ribeiro, en Valdeorras e no sur de Lugo, en Monforte e arredores.

"Paréceme perfecto. Oxalá fora así sempre, pero isto é Galicia e non podemos estar como Andalucía", di outro veciño.

E na costa, pouca diferenza. Hoxe rozaranse os 20 graos en todo o litoral galego, desde Ribadeo ata A Guarda, pasando por Vigo, Pontevedra e A Coruña, onde xa gravamos escenas de praia pola mañá.

Collendo reservas de sol para cando volva a chuvia. Mañá mesmo entra unha nova fronte, pero de momento non se prevé moita auga.