Marco Díaz, un talento na procura da oportunidade de brillar
Proclamouse campión de Europa na categoría R7
O seu soño é competir "en MotoGP ou no mundial de Superbikes"
Tivo que rexeitar unha oferta para participar no Europeo de Moto2 por falta de orzamento
Marco Díaz é campión de Europa na categoría R7. O piloto de Caldas de Reis impúxose na Superfinal disputada no icónico circuito Paul Ricard. Díaz foi segundo na primeira carreira e gañou a segunda, o que lle deu o título europeo por un só punto. "Foi unha carreira moi disputada", sinala o piloto.
Este campión de Europa ten só 20 anos e leva enriba dunha moto practicamente dende que empezou a andar. "Empecei coa moto con 3 anos e despois pasei ás minimotos", lembra Marco Díaz.
A progresión seguiu e Marco agora atrévese a soñar coas categorías grandes: "o meu soño é competir en MotoGP ou no mundial de Superbikes". O talento está máis que demostrado pero Marco afronta un obstáculo que xa lle impediu participar no Europeo de Moto 2. "O problema é sempre o mesmo. Piden cantidades moi grandes que non podemos afrontar", recoñece o piloto.
