As Malvinas decretan o peche inmediato da campaña da lura en que pescan 16 arrastreiros galegos

O Goberno das illas Malvinas decretou o peche inmediato do caladoiro en que 16 arrastreiros conxeladores de capital galego capturan lura patagónica (loligo).

Esta segunda campaña do ano xa xeraba pouca esperanza no sector desde o inicio da mesma. Todo iso debido a que poucos días de comezar a pesqueira os buques atopáronse cunha escaseza de recurso no caladoiro, o que obrigou o Goberno das Falkland a decretar o peche durante 15 días.

Durante ese período algúns buques puideron facer uso doutras licenzas de pesca doutros recursos e continuar a súa actividade noutros caladoiros. Con todo, houbo barcos que tiveron que permanecer inoperativos.

Agora, tras esa parada, os biólogos das Malvinas, que levan a bordo estes buques galegos durante o desenvolvemento da actividade pesqueira, constataron un descenso importante da biomasa o que obrigou a decretar o peche inmediato do caladoiro ata 2027.

As campañas de traballo divídense en dúas: unha no verán, que adoita comezar a finais de xullo e esténdese ata o 30 de setembro, e outra no inverno, que comeza habitualmente a finais de febreiro.