Malleira do Celta Fortuna no duelo de filiais contra a Real B (4-1)

Brillante vitoria do Celta Fortuna no duelo de filiais, que lle permite rematar cunha serie de catro encontros sen gañar nos que so acadara un punto.

O filial segue a traballar arreo no inicio dos partidos e, desta volta, volveuse adiantar axiña no marcador. Foi cun auténtico golazo de Ángel Arcos a saque dunha falta directa, que pasou de xeito maxistral por riba da barreira para anotar pola escadra de Fraga.

A Real Sociedade B non acusou o golpe, e buscou a igualada. Do mesmo xeito, cunha falta directa, tivo a primeira clara, que tirou preto do ángulo Tomás Carbonell.

Pero o Fortuna non renunciaba a ampliar a renda, e Kibet presionou ben na liña de fondo para roubar e dar un pase da morte que non chegou para o remate de Álvaro Marín. O choque de filiais era un encontro de ida e volta e, pouco despois, tiña que empregarse a fondo Coke Carrillo cun paradón logo dun remate a boca de xerro, nunha xogada que tivo unha segunda acción que rematou en córner.

Tocáballe a vez ao Celta Fortuna, e Óscar Marcos entrou como un foguete na área, sendo derrubado antes de poder armar a perna. O penalti transformouno cun potente disparo Álvaro Marín.

E, sen tempo para dixerir o segundo, unha conducción eléctrica de Ángel Arcos permitíalle ao do Rosal asistir a Álvaro Marín, que asinaba o dobrete con sague frío desde o punto de penalti. 3-0 en pouco máis de media hora. Aínda tivo Kibet outra ocasión antes do descanso, que rematou cun tiro frouxo. E a última foi de Rupérez para o filial donostiarra, pero saíu desviada.

Na segunda metade o Celta Fortuna seguiu creando perigo. E, despois dun par de achegamentos por banda, unha xogada colectiva espectacular culminaba cunha asistencia atrás de Óscar Marcos e cun remate axustado de Kibet, o 4-0. O Sanse buscou o tanto da honra, e puido facelo Dani Díaz. Pero os vigueses estaban seguros atrás e rápidos adiante. Puido marcar o Celta nunha contra na que Milla estivo a piques de completar a parede cara a área pequena, e tamén a Real B nun disparo de Carro que saiu desviado. No treito final, un man a man clarísimo de Soroeta sacouno de xeito milagreiro Coke co pé.

A Real Intensificou o asedio á busca do seu gol, e acadouno cunha cabezada de Balda dun córner. E aínda puido marcar outro tanto na última xogada do partido, que errou Kita. Quedou nunha anécdota, co Fortuna sumando a trceira vitoria da temporada, e asentándose na zona tranquila con 11 puntos.