Máis de 80 mortos nun caiuco á deriva ao sur das Canarias tras 26 días no mar

Máis de 80 persoas, entre elas unha meniña, morreron nun caiuco que saíu hai 26 días desde Gambia cara ás Canarias con 128 ocupantes e foi rescatado este xoves de madrugada á deriva ao sur de Canarias, cando só quedaban a bordo 44 sobreviventes e cinco cadáveres.

Segundo confirmou Salvamento Marítimo, a embarcación foi localizada por un dos seus avións este mércores pola tarde a 120 quilómetros de Gran Canaria e recibiu a axuda da Guardamar Urania á medianoite.

Os rescatadores víronse obrigados a deixar no caiuco os cinco corpos localizados, debido ao mal estado do mar. con forte ondada, e á urxencia por ofrecer axuda médica aos sobreviventes. "Eran auténticos cadáveres en vida, como zombis. Derrubábanse, non se sostiñan. A maioría tiña alucinacións, algún mesmo trataba de golpearnos", contou a EFE un dos rescatadores.

Os mariñeiros da Urania contabilizaron a bordo do caiuco cinco falecidos, todos de homes, pero sen descartar que houbese algún máis, porque era de noite, a embarcación tiña o fondo cheo de auga e as ondas golpeábana constantemente contra o seu casco.

A Garda Civil confirmou á oenegué española Caminando Fronteras que o caiuco tiña unhas inscricións no seu casco que coinciden cunha embarcación que partiu o 7 de setembro desde Gambia con 128 ocupantes, entre eles catro mulleres e unha bebé.

Este dato concorda co testemuño dos sobreviventes, que contaron á Cruz Vermella durante a súa asistencia no peirao de Arguineguín que saíran cara ás Canarias con máis de cen persoas, moitas das cales morreron durante a travesía. 

Durante o regreso da Guardamar Urania cara a Gran Canaria, Salvamento Marítimo tivo que enviar un helicóptero para que evacuase de emerxencia a tres dos sobreviventes aos hospitais das Palma de Gran Canaria, dado o seu precario estado de saúde.

Os demais chegaron sobre as 3:30 a terra esgotados e sen apenas sosterse en pé. De feito, membros do equipo humanitario que os atendeu contaron a EFE que se derrubaban sobre a mesa cando a Policía os sentaba para anotar o seu nome e procedencia. Segundo os primeiros datos, aínda provisionais, os sobreviventes son todos homes procedentes de Gambia e Mali.

O 112 de Canarias precisa que seis deles foron hospitalizados con cadros de deshidratación e desorientación, así como síntomas de beber auga do mar. Ademais, dous dos ingresados presentaban traumatismos.