Maior seguridade na gran final das Series Mundiais de tríatlon pola participación de atletas israelís

A participación de seis atletas de Israel na gran final das Series Mundiais de tríatlon de Pontevedra obrigou ás autoridades para reforzar a seguridade nesta competición deportiva. Así o anunciou o subdelegado do Goberno en Pontevedra, Abel Losada, tras presidir este xoves unha reunión para preparar este dispositivo de seguridade.

O obxectivo é que non se repitan os "graves incidentes" que se produciron o ano pasado durante a etapa da Volta Ciclista de España que percorreu a provincia de Pontevedra.

"Quero facer un chamamento á tranquilidade e ao respecto mutuos", pediu Losada, que explicou que as autoridades coñecen desde "fai tan só tres días", que estes deportistas israelís estarían en Pontevedra.

Tendo en conta o "antecedente" da Volta, o subdelegado avanzou que se despregará un operativo liderado pola Policía Nacional e no que colaborarán a Garda Civil, a Policía Local de Pontevedra e a Policía Autonómica.

Abel Losada explicou que os mandos policiais decidiron "afinar" o dispositivo de seguridade previsto para esta proba "incorporando esta variable", xa que lles parece un asunto da "máxima relevancia" ante a "colisión de dereitos" existente. Por unha banda, Losada lembrou que os cidadáns teñen "liberdade de expresión" para manifestar a súa solidariedade co pobo palestino e a súa repulsa polo xenocidio de Gaza. E por outro, engadiu, o desexable é que unha proba deportiva "quede iso", garantindo o dereito do público para desfrutar dela.

"É unha festa que dá unha gran proxección á cidade e á provincia. Espero que saibamos separar adecuadamente o rexeitamento que nos produce o que sucedeu e segue sucedendo en Palestina cunha competición deportiva", sentenciou.