Louzán chama "populista" a Caballero e o alcalde responde chamándolle "mentireiro"
Caballero: "Louzán, en lugar de falar e dicirnos por que se cambiou a cualificación, conta que falou comigo unha vez de algo que é completamente falso
Louzán avanzou que a reforma do modelo arbitral é “imprescindible e necesaria”
O presidente da Real Federación Española de Fútbol (RFEF), Rafael Louzán, falou da controversia sobre as sedes do Mundial 2030 e a queixa de Vigo de que foi excluída irregularmente. Louzán insistiu en que o desexo é que tanto a cidade galega como Valencia poidan ser tamén elixidas, aínda que incidiu en que “a última palabra” tena a FIFA.
Con todo, advertiu ao alcalde de Vigo, Abel Caballero, ao que describiu como “populista”, que se quere que as cousas saian ben, evite o choque de trens.
“Non é o camiño. Confúndese claramente. Se verdadeiramente quere que Vigo teña posibilidades, haberá que dialogar”, recomendou.
No mesmo acto, asegurou que a reforma do modelo arbitral é “imprescindible e necesaria” e expresou a súa confianza en que entre en vigor a próxima tempada co consenso de todas as partes.
Louzán subliñou que os distintos actores que participan na comisión encargada de renovar o sistema arbitral mostraron coincidencias ata o de agora e que arredor do 30 de xuño haberá un borrador con propostas.
Pola súa banda, o alcalde de Vigo, Abel Caballero, chamou "mentireiro" ao presidente da Real Federación Española de Fútbol, Rafael Louzán, e asegurou que a exclusión de Vigo como sede do Mundial de 2030 ten orixe política, de cando o dirixente federativo perdeu a Deputación de Pontevedra.
Caballero lembrou que Vigo "deixou de estar" entre as elixidas para albergar o Mundial de dentro de cinco anos porque "alguén cambiou unha nota" e San Sebastián superouna na clasificación.
"Louzán, en lugar de falar e dicirnos por que se cambiou a cualificación, conta que falou comigo unha vez de algo que é completamente falso. É unha persoa mentireira; sabémolo todos", sinalou o alcalde.
