Localizan un home morto no acceso ao aparcadoiro subterráneo da Choupana, en Santiago

Sucedeu a primeira hora da mañá do xoves. Unha particular deu a voz de alarma ao atopar o corpo sen vida dun home no acceso ao aparcadoiro subterráneo da Choupana, a poucos metros do Hospital de Santiago. O home perdera a vida por un paro cardíaco provocado, segundo apuntan todos os indicios, por unha sobredose. 

Dáse a circunstancia de que o suceso tivo lugar moi preto desta vivenda abandonada da avenida de Bilbao, coñecida como a casa da palmeira, e sinalada polos veciños da Plataforma Santa Marta Seguro como un dos punto de venda e consumo de droga que xera conflito no barrio. De feito, esta mesma semana desenvolveuse un operativo policial nos seus arredores. 

Para o vindeiro luns esta asociación convoca unha concentración ás nove na praza Roxa onde esixirá medidas para desartellar este e outro punto de venda da zona, coñecido como Banco do Pobre, frecuentados, segundo din, por xente cada vez máis nova.