As nove persoas detidas en Galicia formaban dúas células "moi activas" en tráfico de drogas e fármacos

As nove persoas detidas o pasado mércores en Sanxenxo, Poio e Vilaboa integraban, segundo os investigadores, dúas células "organizadas e moi activas" dedicadas ao tráfico de cocaína, haxix, tabaco e medicamentos a grande escala. Estas dúas células, que integraban un único grupo criminal, estaban asentadas en dous destes municipios, Sanxenxo e Vilaboa, e operaban en todas as Rías Baixas.

Así o acreditaron as autoridades cun operativo conxunto despregado pola Garda Civil e a Policía Nacional e que foi bautizado como operación Bordafi/Dado. A investigación sobre este armazón criminal comezou en febreiro de 2025 por mor da actividade dun home residente en Sanxenxo que, en conivencia con outras persoas, dedicábase á distribución de grandes cantidades de droga.

Tras analizar os movementos dos investigados, os axentes lograron detallar "con minuciosidade" a metodoloxía que usaban para operar coa maior discreción posible. No marco deste operativo, a Policía Nacional e a Garda Civil detiveron nove persoas e realizaron sete rexistros, catro en Sanxenxo, dous en Poio e un en Vilaboa.

Nestes rexistros interviñéronse cinco quilos de clorhidrato de cocaína e catro caixas de medicamentos con máis de 150 fármacos diferentes. Ademais, incautáronse de 550 paquetes de tabaco de contrabando, 115 gramos de haxix, seis escopetas, entre elas dúas de aire comprimido, unha carabina, dezaseis cartuchos de calibre 7,62 mm, un casco do calibre 7,62 mm e cinco balas de calibre 44.

A todo iso súmanse 34.000 euros en metálico, quince terminais de telefonía móbil, dúas tablets, un computador e diversos útiles para a manipulación e adulteración das drogas.

A operación, desenvolvida por equipo de delincuencia organizada e antidroga (EDOA) da Garda Civil en Pontevedra e polo Grupo II da unidade de drogas e crime organizado (Udyco) da Policía Nacional, continua aberta e non se descartan máis detencións.